Облыстық білім басқармасының мәліметінше, оқулықтар 11 баспадан сатып алынған және олар негізінен 4, 7, 8, 10–11 сыныптарға арналған. Соның нәтижесінде аймақтағы барлық білім беру ұйымдары 100 пайыз көлемде оқулықтармен жабдықталды.
Жаңартылған білім беру мазмұнына сәйкес, биыл алғаш рет 4-сынып оқушылары үшін қазақ тілінде оқытатын мектептерге арналған орыс тілі, сондай-ақ ағылшын, неміс, француз тілдері, еңбекке баулу, бейнелеу өнері, цифрлық сауаттылық және жаратылыстану пәндерінен жаңа оқулықтар дайындалды.
Сонымен қатар орта және аға буынға арналған кітаптар да қайта басылып шықты. Атап айтқанда, 7-сыныптарға қазақ тілі мен әдебиеті (орыс тілінде оқытатын мектептер үшін), орыс тілі мен әдебиеті (қазақ тілінде оқытатын мектептер үшін), математика, физика, химия, биология, Қазақстан тарихы, ағылшын тілі және көркем еңбек пәндері бойынша жаңартылған басылымдар жеткізілді.
Қосымша 7–8 сыныптарға арналған «Қазақстан географиясы», 8-сыныпқа «Қазақстан тарихы», 10–11 сыныптарға «Бастапқы әскери және технологиялық дайындық», сондай-ақ 11-сыныпқа «Құқық негіздері» оқулықтары қайта шығарылды.
Білім басқармасында атап өтілгендей, бұл шара Мемлекет басшысының білім сапасын арттыру және оқу процесін сапалы оқулықтармен қамтамасыз ету жөніндегі тапсырмаларын орындау мақсатында жүзеге асырылып отыр.
