«Алматы облысы көпсалалы клиникалық ауруханасы — шаруашылық жүргізу құқығындағы мемлекеттік коммуналдық кәсіпорын болған, яғни толығымен жекешелендірілген. Мемлекетпен екеуара келісім-шартқа 05.11.2020 жылы қол қойылды. Десе де, талдау кезінде бірқатар заңбұзушылықтар анықталды. Бұл мекемеге бөлінген 5,5 млрд теңге инвестицияның 8 пайызы ғана (448 млн тг) игерілді. Бұдан бөлек, 2020 жылдан бері мемлекет жеке серіктес компанияның 200 млн теңгеден астам сомада инвестициялық шығындарын өтеп берді. Және медициналық көмектің кепілдік берілген көлемі мен МӘМС шарттары шеңберінде 14,6 млрд теңге бөлді», — деді департамент басшысы Серік Орымбетов.
Серік Орымбетовтың сөзіне сүйенсек, аурухана басшылығына медициналық қызметтерді сапалы көрсету, ақ халаттылардың білімін одан ары жетілдіру, аурухананы заманауи техникамен жабдықтау секілді ауқымды талаптар қойылса да, басшылық мемлекеттік тапсырысты дұрыс орындамады.
Мысалы, дәрігер көмегіне жүгініп келген 39 мың тұрғынның 25 мыңы тиісті деңгейде ем ала алмаған. Сонымен қатар дәрігерлер науқастардың халін дұрыс білмей жатып, стационарлық ем қабылдауға тіркеуден бас тартқаны жайлы деректер бастан асады.
«Бұл мәселелердің түп төркіні басқада. Ол – медициналық нысандарды шаруашылық жүргізуге құқығы бар мекемеге айналдырғанда белгілі бір нормативтік заңның болмауы. Ұлттық экономика министрлігінің 2015 жылғы 16 қаңтардағы бұйрығы бойынша жұмыс істеледі. Десе де, аталған құжатта әлеуметтік нысандардың жекешелендірілуі туралы сөз етілмеген», — деді АнтиКор басшысы.
Басшының айтуынша, мемлекеттік сатып алу қызметін жүргізуші комиссияның шектен тыс өкілеттілігі бар. Олар тендерге қатысушы компанияларды бөліп, жарады.
«Осындай деректер көбеймеуі үшін құқықтық актілерді және медициналық нысандарды мемлекет балансына қайтару сұрақтарын республика шеңберінде талқыға салуды сұраймыз», — деді Серік Орымбетов.
