Бөлінген қаражаттың басым бөлігі әлеуметтік саланы дамытуға және инфрақұрылымдық жобаларды іске асыруға бағытталды. Облыстық экономика және бюджеттік жоспарлау басқармасының басшысы Асылан Ораздың айтуынша, мұндай жетістік халықтың әл-ауқатын арттыруға жасалған жүйелі жұмыстың нәтижесі болып табылады.
Облыстың меншікті кірісі де жыл сайын өсіп келеді. 2022–2024 жылдары бұл көрсеткіш екі есеге жуық ұлғайып, 630 миллиард теңгеге жетті. Түсімнің негізгі бөлігін акциздік салықтар құрап отыр.
Соңғы үш жылда өңірде 696,5 шақырым жол жөнделді. Бұл көлік қатынасының жеңілдеуіне және өңіраралық байланыстардың нығаюына әсер етті. Сонымен қатар, 18 елді мекенге табиғи газ жеткізіліп, тұрғындардың тұрмыс сапасы жақсарды.
Бюджеттің 60 пайызы әлеуметтік салаға бөлінді. Оның ішінде білім беру, денсаулық сақтау және әлеуметтік қорғау бағытындағы жобаларды іске асыруға айрықша көңіл бөлінген.
Экономикалық көрсеткіштердің өсуі мен әлеуметтік жобалардың жүзеге асуы Алматы облысының даму қарқынының күшейгенін және тұрғындардың жағдайының кезең-кезеңімен жақсарып жатқанын көрсетеді.
