Алматы облысының әкімі Марат Сұлтанғазиев Орталық коммуникациялар қызметінде өткен брифингте Талғардағы Шерзат Болаттың өліміне қатысты тергеу барысы туралы пікір білдіріп, тұрғындарды сабыр сақтап, ресми ақпарат көздеріне сенуге шақырды, деп хабарлайды alataunews.kz.
«Марқұмның отбасысына қайғырып көңіл айтамыз. Бұл жағдай қатаң бақылауда. Құқық қорғау органдары қажетті жұмыстарды атқарып жатыр. Іс қазіргі уақытта Ішкі істер министрлігі мен Бас прокуратураның бақылауында. Осыған орай, қоғамға үндеу жасаймын: сабыр сақтап, тек ресми ақпарат көздеріне назар аударуды сұраймын. Құқық қорғау органдары өз жұмыстарын ашық жүргізіп, бұқаралық ақпарат құралдары арқылы ақпарат беруде», — деді Марат Сұлтанғазиев.
Алматы облысы прокуратурасының мәліметінше, Шерзат Болаттың өліміне қатысты сотқа дейінгі тергеу аяқталуға жақын. Қажетті тергеу амалдары толық жүргізіліп, күдікті деп танылған барлық 11 адам ұсталды. Бұған дейін ІІМ басшысының орынбасары Санжар Әділов те істің тергеуі аяқталғанын растаған болатын.
Еске сала кетейік, 16 жастағы Шерзат Болат 4 қазанға қараған түні Талғарда қаза тапқан. Бұл қайғылы оқиға қоғамда үлкен резонанс туғызды.
9 желтоқсанда Талғардың шетінде марқұмның ағасының денесі табылды. Алдын ала деректер бойынша, ол өзіне қол жұмсаған. Полиция кейіннен оның туысымен жазысқан соңғы хабарламаларын жариялады. Жерлеу рәсімі кезінде Шерзат Болаттың әкесі Қаржаубай Нұрымов хулигандық жасағаны үшін ұсталып, 15 тәулікке қамалды. Сонымен қатар, оның бір қарындасы да қамауға алынып, екінші қарындасы 74 мың теңге көлемінде айыппұл төлеуге міндеттелді.
Бұл қайғылы оқиға қоғам назарында болып, құқық қорғау органдарының әрекеттері қатаң бақылауға алынған.
