Алматы облысы әкімінің орынбасары Арслан Дәндібаевпен кездесуде кәсіпкерлер Еңбекшіқазақ ауданында мектепті тамақпен қамтамасыз ету бойынша тендерді белгісіз компания жеңіп алғанын айтты. Кәсіпкерлердің айтуынша, компанияның бұл салада тәжірибесі жоқ және қызмет көрсететін компанияны ауыстыру процедураларына байланысты балалар біраз уақыт тамақсыз қалуы мүмкін.
«Еңбекшіқазақ ауданында белгісіз компания 18 мектепте қоғамдық тамақтану саласында қызмет көрсетуге тендер жеңіп алды. Біздің қойған талаптарымызға мүлдем сәйкес келмейді. Біз компанияның бұл салада тәжірибесі жоқ екенін тексеріп білдік. Осы жағдайды шешуді сұраймын», — деді кәсіпкер Зәмзәгүл Мамырбаева.
Сонымен қатар, тағы бір кәсіпкер, балабақша иесі Гүлзайра Құсманова 7 мың бала балабақшаға субсидия алу үшін кезекте тұрғанын, бірақ белгісіз себептермен тендер өткізілмей жатқанын айтты.
«7 мың бала кезекте тұр. Бір жылдан бері тендер өткізілмейді. Балабақшаның барлық құрылтайшылары өз есебінен балаларды тамақпен қамтамасыз етеді, жұмыс орындарын ашады, жалдау ақысын төлейді және т.б. Жыл аяқталып жатса да осы мәселе шешілер түрі жоқ», — деді ол.
Әкімнің орынбасары бизнес-қоғамдастықтың сұраулары бойынша мәселені қарауға уәде берді.
«Сұрауларыңызды білім басқармасына жеткіземіз және оған ресми түрде жауап береміз», — деді Дәндібаев.
