Алматы облысы әкімінің Райымбек ауданы жұртшылығымен өткізген жиынында Шалкөде ауылының тұрғыны Қасымжан Рақымбеков елді мекендегі ауыз су, емхана, Мәдениет үйі мәселелері туралы бірнеше сұрақ қойды.
Тұрғынның сөзіне сүйенсек, ауылдағы емханаға жөндеу жасалмағалы 30 жылдан астам уақыт болған. Қазіргі таңда шатырынан су өтіп, электр жүйесіне зақым келген. Ал жылыту маусымында қанша от жақса да, нысан жылымайды, себебі, бар жылу бүлінген шатырдан сыртқа шығып кететін көрінеді.
«Емханаға жөндеу қашан жасалатынын білгіміз келеді. Екінші мәселе — ауыз су. 2020 жылы басталған құрылыс 2022 жылы аяқталуы керек болған. Бірақ, халыққа әлі су берілмеді, жұрт суды тасып ішіп отыр. Үшінші сұрақ — Мәдениет үйінің апатты деп танылып, сүріліп кетуіне байланысты болмақ. Жаңа нысан салына ма, жоспарда бар ма?», — деді Қасымжан Рақымбеков.
Тұрғынның мұң-мұқтажын тыңдаған өңір басшысы облыста 1029 проблема бар екенін, олардың кезең-кезеңімен шешілетінін айтты.
«Ең алдымен халық тығыз қоныстанған және денсаулық сақтау саласында ең өзекті мәселе болып тұрған жердің түйіткілі қаралады. Емхананың жобалық-сметалық құжаты дайын. Ал ауыз су мәселесіне келсек, мердігер компания құрылыс жұмысын осы жылдың қарашасына дейін аяқтауға міндеттелді. Ол міндетін орындамаса, құқық қорғау органдарымен бірлесе отырып, тиісті шаралар қолданылады», — деді Марат Сұлтанғазиев.
Өңір басшысының мәліметінше, Шалкөде ауылында халық саны аз болғандықтан, әзірше, Мәдениет үйін тұрғызу жоспарланып отырған жоқ.
