Іс-шара шеңберінде облыстың жол-патрульдік полиция қызметкерлері жүргізушілердің реттелмейтін/реттелетін жаяу жүргіншілер өткелдерінде жол жүру ережелерін сақтауын қадағалауды күшейтеді, сондай-ақ жаяу жүргіншілердің жол бөлігін белгіленбеген жерлерде жиі кесіп өтетін көше учаскелеріне баса назар аударады.
Жыл басынан бері Алматы облысының жолдарында 961 жол-көлік оқиғасы орын алып, 229 адам қаза тауып, 1 199 адам жарақат алған. Бұл ретте 40 оқиға жаяу жүргіншілер кінәсінен орын алған.
«Естеріңізге сала кетейік, жаяу жүргінші жол қозғалысының ең осал және қорғалмаған қатысушысы болып табылады. Сол себепті барлық жүргізушілерді жаяу жүргіншілер өткелінен өтіп бара жатқанда қырағы болуға шақырамыз. Ал жаяу жүргіншілерге, өз кезегінде, жолды кесіп өту кезінде гаджеттердің барлық түрлеріне алаңдамау қажеттілігін және ең бастысы, жүргізушілер сізді көретініне көз жеткізу керектігін ескертеміз! Қараңғыда қозғалу кезінде жарық шағылыстыратын элементтерді немесе жарық шағылыстыратын киім киюді ұсынамыз», — деп хабарлады полиция.
