Қазіргі уақытта өңірде 83 мал көму орны бар. Оның 66-сы – аудандық ветеринария бөлімшелерінің, ал 17-сі – аудан әкімдіктерінің қарамағында.
Облыстық ветеринария басқармасының мәліметінше, 2025 жылы 37 нысанға экологиялық қорытынды берілген. Қалған 46 нысанның құжаттары 2026 жылдың бірінші тоқсанының соңына дейін рәсімделмек. Бұл шаралар ветеринариялық қауіпсіздікті арттырумен қатар, экологиялық талаптардың сақталуын қамтамасыз етуге бағытталған.
2024 жылдан бері облыста 19 жаңа мал көму орны салынды. Сонымен қатар, 26 нысанның жобалық-сметалық құжаттары әзірленіп жатыр. Бұл жобалар 2026–2028 жылдары іске асырылмақ. «Бұл – өңірдегі мал арасында аурудың таралуына жол бермеу және ветеринариялық тұрақтылықты қамтамасыз етуге бағытталған жүйелі жұмыс. Барлық мал өлекселері алдымен ветеринариялық тексеруден өтеді, маманның рұқсатынан кейін ғана көміледі», – деп хабарлады облыстық ветеринария басқармасы.
Айта кету керек, Алматы облысындағы мал көму орындарының басым бөлігі 2005–2013 жылдары салынған. Қазір бұл нысандар кезең-кезеңімен жаңартылып, жаңа экологиялық талаптарға сәйкестендірілуде. Бұл жұмыстар өңірде экологиялық қауіпсіздікті күшейтіп, ауыл шаруашылығы саласындағы санитарлық ахуалды тұрақтандыруға мүмкіндік береді.
