Ауқымды шара таңғы 06:00-де Бақанас тасжолының бұрылысында басталады. Биылғы бәйге алғаш рет Алматы облысында ұйымдастырылып отыр. Бұған дейінгі жарыстардың екеуі халықаралық деңгейде өткізілген болатын.
Шараның басты мақсаты — қазақ халқының ұлттық құндылықтарын, жылқы мәдениеті мен тарихи мұрасын насихаттау.
Бәйгеде Оңтүстік Африка, Қырғызстан, Мажарстан, Иран, Ресей Федерациясы, Татарстан мен Башқұртстан және Қазақстанның 13 өңірінен келген командалар бақ сынайды. Жалпы саны — 19 команда.
Жарыс бес күнге созылады. Әр кезеңнің ұзақтығы — 100 шақырым, ал жалпы қашықтық — 500 шақырым. Бағыт Балқаш, Жамбыл және Іле аудандарының аумағы арқылы өтеді. Әр 50 шақырым сайын қатысушыларға арнайы тынығу және демалыс орындары дайындалады.
Ашылу салтанатында этноауыл құрылып, 12 қанаттық бес қазақ үй тігіледі. Киіз үйлерде Алтын адам музейі, этнографиялық экспозициялар, театр қойылымдары, қолөнер шеберлерінің бұйымдары мен туристік көрмелер ұсынылады. Сонымен қатар ұлттық спорт түрлері, асау үйрету және бие сауу көріністері көрсетіледі.
Марафонның жабылу салтанаты 2025 жылғы 14 мамыр күні сағат 17:00-де Қонаев қаласының орталық алаңында өтеді. Онда «Алаш ұлы», «Рух», «Абырой» және «Үшқоңыр» фольклорлық-этнографиялық ансамбльдері өнер көрсетеді. Салтанатты шараға мемлекеттік және қоғам қайраткерлері, партиялар мен ұлттық спорт федерацияларының өкілдері, өнер қайраткерлері және қоғам белсенділері қатысады деп күтілуде.
Алматы облыстық Мәдениет, архивтер және құжаттама басқармасының басшысы Данияр Әлиев шараның маңыздылығын атап өтті:
«Қазақ халқы үшін жылқы түлігі — төл болмыс пен дәстүрдің айқын көрінісі. Бұл бәйге ұлттық рухты дәріптеп, салт-дәстүрімізді насихаттайды. Сонымен қатар өңіріміздің табиғатын таныстырып, отандық туризмнің дамуына үлес қосады», — деді спикер.
«Ұлы дала жорығы» — ұлт рухын жаңғыртып, болашақ ұрпаққа тағылым беретін маңызды мәдени-спорттық оқиға.
