Бюджет қаражаты есебінен жалпы аумағы 118 мың шаршы метрді құрайтын, 1522 пәтерлік 28 үйдің құрылысы аяқталып, пайдалануға берілмек. Бірқатар үйлер қазірдің өзінде тапсырылды, ал проблемалық нысандар бойынша тиісті шаралар қабылдануда.
Талғар және Жамбыл аудандарында кейбір пәтерлерге тұрғындар қоныстанып үлгерді, бірнеше нысан аяқталу сатысында. Облыс әкімдігінің мәліметінше, барлық мәселелер бақылауда, мерзімді бұзған мердігерлерге қатысты заң аясында шара қолданылуда.
Сонымен қатар дайын тұрғын үйді сатып алу жұмыстары да қатар жүргізіліп жатыр. Биыл әлеуметтік осал топтар мен кезекте тұрғандар үшін 1700 пәтер сатып алуға 27,4 млрд теңге бөлінген. Оның ішінде 200-ден астам отбасы жаңа пәтердің кілтін алып үлгерді, қалғандары кезең-кезеңімен қамтамасыз етіледі.
Алматы облысы әкімінің орынбасары Асет Масабаев аймақта азаматтар алдындағы міндеттемелерді толық орындау көзделгенін атап өтті:
«Кезекте тұрған әрбір отбасы өз баспанасын уақытында алуы маңызды. Проблемалық нысандар бойынша бақылауды күшейттік, адал емес мердігерлерге шара қолданылып жатыр. Сонымен қатар дайын тұрғын үйді сатып алу жұмыстары жүргізілуде, халықты ұзақ күттірмеу үшін», – деді ол.
Жыл соңына дейін Қонаев, Талғар және Есік қалаларында ірі тұрғын үй нысандарының құрылысы аяқталады деп жоспарлануда. Құрылыстың дайындық деңгейі 90 пайыздан асқан, үйлерді белгіленген мерзімде пайдалануға беру көзделіп отыр.
