Мұслим Сәғадиевтің айтуынша, 2025 жылдың 15 қыркүйегінен бастап облыс тұрғындарына тұмауға қарсы жаппай вакцина егу науқаны басталады. Эпидемиологиялық маусымға орай Ресейде өндірілген «Гриппол плюс» вакцинасынан 160 мың доза сатып алынған.
Вакцина 6 айдан асқан балаларға, жүкті әйелдерге, қарт адамдарға және созылмалы аурулары бар азаматтарға тегін егіледі. Қорғаныс әсері екпеден кейін 8–12 күнде қалыптасып, шамамен бір жылға дейін сақталады.
«Қазақстанда жыл сайын 4 миллионға жуық ЖРВИ жағдайы тіркеледі. Оның 65 пайызы – 14 жасқа дейінгі балалар арасында кездеседі», – деді Лейла Серікбаева.
Бүгінде облыс бойынша 305 егу кабинеті дайындалған. 15 қыркүйектен бастап мектептерде де вакцинациялау жүргізіледі. Бұдан бөлек, білім беру ұйымдарында таңғы сүзгілер күшейтіліп, антисептиктер пайдалану, жеке гигиена бойынша түсіндіру жұмыстары ұйымдастырылады. Сондай-ақ ауру белгілері бар балаларды уақытылы оқшаулау шаралары қарастырылған.
«Егер бір сыныптағы оқушылардың 30 пайызы сырқаттанса, ол сынып қашықтан оқыту форматына көшіріледі», – деді Мұслим Сәғадиев.
Мамандардың болжамы бойынша, алдағы маусымда тұмау вирусының үш түрі – А/H1N1, А/H3N2 және В типі қатар айналымда болады. Вирустардың белсенділігі қазан айының ортасында басталып, қаңтар-ақпан айларында шарықтау шегіне жетпек.
«Вирустың таралуын болдырмаудың ең тиімді жолдары – бетперде тағу, қолды жиі жуу, бөлмені желдету, көпшілік жиналатын орындардан аулақ болу. Ал ауру белгілері байқалған жағдайда міндетті түрде дәрігерге қаралу қажет», – деп қорытындылады Мұслим Сәғадиев.
