«SAQTAN» әлеуметтік жобасы аясында ұйымдастырылған рейд кезінде сағат 23:00-ден кейін жұмыс істейтін ойын-сауық орындары мен мейрамханалар тексерілді. Тәртіп сақшыларының айтуынша, түнгі уақытта ата-анасының қарауынсыз жүрген 5 жасөспірім анықталған. Олардың заңды өкілдеріне ҚР Әкімшілік құқық бұзушылық туралы кодекстің талаптарына сәйкес әкімшілік хаттамалар толтырылды. Сонымен қатар, ойын-сауық орнына кірген 1 жасөспірімге және оны ішке кіргізген мекеме әкімшілігіне де шара қолданылды. Бір ата-ана бала тәрбиесіне салғырт қарағаны үшін жауапқа тартылса, бір жасөспірім ювеналды полиция есебіне алынды.
Рейд Мемлекет басшысының «Заң және тәртіп» қағидаты аясында өтті
Жоба жетекшісі Әділет Айтқазының айтуынша, бұл рейдтер Мемлекет басшысы Қасым-Жомарт Тоқаевтың «Заң және тәртіп» қағидатын жүзеге асыру аясында тұрақты түрде өткізіліп келеді.
«Біз үшін басты мақсат – кәмелетке толмағандардың түнгі уақытта ойын-сауық орындары мен алкоголь, темекі сатылатын дүкендерге кіруіне жол бермеу. Бұл бағыттағы түсіндіру және алдын алу шараларын полициямен бірлесе отырып, жүйелі түрде жалғастырамыз», – деді ол.
Қоғамдық кеңес өкілі: ата-ана жауапкершілігі – басты назарда
Қалалық қоғамдық кеңестің төрағасы Сергей Горянойдың айтуынша, түнгі сағат 22:00-ден кейін кәмелетке толмағандардың жалғыз жүруіне жол беруге болмайды.
«Егер ата-аналар балаға тиісінше бақылау жасамаса, олар ҚР Әкімшілік құқық бұзушылық туралы кодекстің 442-бабы 1-бөлігіне сәйкес жауапкершілікке тартылады. Құқық бұзушылық қайталанған жағдайда, іс ювеналды сотқа жолданады», – деді ол.
«SAQTAN» жобасы – жастарды зиянды әдеттерден сақтау жолындағы нақты қадам
Айта кетейік, «SAQTAN» – Алматы облыстық Жастар саясаты мәселелері жөніндегі басқармасының қолдауымен жүзеге асырылып жатқан әлеуметтік жоба. Оның негізгі мақсаты – жастар арасында нашақорлық, суицид, вейпинг, құмар ойындар және басқа да зиянды әдеттердің алдын алу. Жоба аясында түнгі рейдтерден бөлек, кең ауқымды түсіндіру жұмыстары, спорттық және ақпараттық іс-шаралар тұрақты түрде ұйымдастырылады.
Жастардың қауіпсіздігі мен тәрбиесі – қоғамның ортақ жауапкершілігі. Сондықтан мұндай бастамалар құқықтық мәдениетті қалыптастыруда маңызды рөл атқарады.
