Заманауи өндіріс орнының салтанатты ашылу рәсімі 1 қараша күні Қонаев қаласында өтті. Іс-шараға Алматы облысының әкімі Марат Сұлтанғазиев, ауыл шаруашылығы вице-министрі Азат Сұлтанов, отандық кәсіпкерлер және Қытай Халық Республикасынан келген серіктестер қатысты.
Жаңа кәсіпорын өңірдің аграрлық секторындағы ең ірі инвестициялық жобалардың бірі саналады. Зауыттың жылдық өндірістік қуаттылығы 1 миллион тоннадан астам дайын өнім шығаруға мүмкіндік береді. Жобаның жалпы инвестиция көлемі 15 миллиард теңгеден асты. Бұл – Қаскелең қаласында жұмыс істеп тұрған зауыттан кейінгі Алматы облысындағы осындай екінші өндіріс орны.
Алматы облысының әкімі Марат Сұлтанғазиев агрокешеннің іске қосылуы ауыл шаруашылығы өнімдерін өңдеу саласының дамуына тың серпін беретінін атап өтті. Оның айтуынша, облыстың географиялық артықшылығы, көлік-логистикалық мүмкіндігі және инвесторларға жасалған қолдауы агросекторға қосымша инвестиция тартып, өңдеу өнеркәсібінің үлесін арттыруға жағдай жасап отыр.
«Алматы облысы – еліміздің ең қарқынды дамып келе жатқан өңірлерінің бірі. Біз қосылған құны жоғары өнім өндірісін қолдауды жалғастырамыз. “Қапшағай бидай өнімдері” – инновациялық, экспортқа бағытталған өндірістің нақты үлгісі», – деді өңір басшысы.
Ауыл шаруашылығы вице-министрі Азат Сұлтанов бұл жоба Мемлекет басшысының ауыл шаруашылығы өнімдерін терең өңдеуді дамыту жөніндегі тапсырмасына сай жүзеге асқанын атап өтті. Оның айтуынша, мұндай өндіріс орындары аграрлық өнімнің ішкі нарықтағы құнын арттырып қана қоймай, сыртқы нарықтарға шығу мүмкіндігін күшейтеді.
«Бұл – бизнес пен мемлекеттің ортақ мақсатының көрінісі. Терең өңдеу – саланың бәсекеге қабілеттілігін арттыратын негізгі бағыт. Жоба ауыл шаруашылығының тиімділігін көтеріп, өңір экономикасына қосымша серпін береді», – деді вице-министр.
Рәсім соңында қатысушылар зауыттың өндірістік алаңын аралап, технологиялық процесс барысымен танысты. Қызыл түймені басу және локомотив гудогын іске қосу арқылы агрокешеннің жұмысы ресми түрде басталды.
