Өңір басшысы кіріспе сөзінде Қазақстан мен Нидерланд арасындағы серіктестік қатынастардың маңыздылығына тоқталып, ауыл шаруашылығы саласындағы ынтымақтастықтың әлеуеті зор екенін атап өтті. Сондай-ақ Алматы облысының заманауи технологияларды енгізуге, инвестиция тартуға және білім мен тәжірибе алмасуға әрқашан дайын екенін жеткізді.
Кездесуге Қазақстан тарапынан ҚР Ауыл шаруашылығы вице-министрі Азат Сұлтанов, «Kazakh Invest» компаниясының өкілі Ұлбосын Сарыбаева, министрліктің егіншілік департаменті директорының орынбасары Жандәулет Жанбырбаев және облыстық басқармалардың өкілдері қатысты.
Нидерланд тарапынан министрліктің бас хатшысы Ян-Кейс Худ, аға саяси кеңесші Сара Виссерс Равичандран, кеңесшілер мен Қазақстандағы және Ресейдегі Нидерланд елшілігінің дипломаттары болды.
Бұл кездесу Қазақстан мен Нидерланд арасында дипломатиялық қатынастардың орнағанына 33 жыл толуына орай өткізіліп, қос ел арасындағы іскерлік ынтымақтастықтың нығайып келе жатқанын көрсетті.
Марат Сұлтанғазиев Алматы облысының ауыл шаруашылығы саласындағы жетістіктеріне тоқталды: өңір республикадағы ауыл шаруашылығы өнімдерінің 8%-ын өндіреді, 100-ден астам елмен сауда байланысы бар, ал жалпы өңірлік өнім көлемі бойынша елімізде оныншы орыннан бесінші орынға көтерілген.
Кездесу барысында тұрақты егіншілік, су ресурстарын басқару, инновациялар мен кәсіби оқыту бағыттары талқыланды. Бірлескен кәсіпорындар мен білім беру бағдарламаларын іске қосу жоспары ұсынылды.
Ян-Кейс Худ жылы қабылдау үшін алғыс білдіріп, азық-түлік қауіпсіздігі, ауылдық аймақтардың тұрақты дамуы мен агроинновациялар саласында әріптестікті тереңдетуге дайын екенін айтты.
2024 жылдың қорытындысы бойынша Алматы облысы мен Нидерланд арасындағы тауар айналымы 39 млн АҚШ долларын құраған. Өңірде Нидерланд капиталының қатысуымен 9 кәсіпорын жұмыс істейді.
Сапар аясында делегация LST Agro, FRUT ART және Ospanova Development ауыл шаруашылығы кәсіпорындарында болды. Мұнда заманауи өндіріс технологиялары мен қуаттылықтар таныстырылды.
Бұл кездесу – екіжақты агроынтымақтастықты кеңейтуге бағытталған маңызды қадам. Қол жеткізілген уағдаластықтар өңірдің экспорттық әлеуетін арттырып, ауыл шаруашылығы инфрақұрылымын жаңғыртуға серпін береді деп күтілуде.
