Кездесу барысында үш негізгі мәселе қаралды. Атап айтқанда, МӘМС жүйесіндегі өзгерістер туралы халықты ақпараттандыру, жүйеге қатысу динамикасы және әлеуметтік осал санаттағы азаматтардың жарна төлеу тетігі сөз болды.
Жиында Қанат Есболатов тұрғындарды МӘМС жүйесіндегі жаңалықтар мен өзгерістер туралы уақытылы және сапалы хабардар етуге бағытталған жоспарлар бекітілгенін атап өтті. Сондай-ақ ол Қазақстан Республикасы Премьер-министрінің орынбасары Аида Балаеваның 8 желтоқсанда өңірлермен әлеуметтік мәселелер бойынша өткізген кеңесінде берілген хаттамалық тапсырмаларға сәйкес, ақпараттық-түсіндіру жұмыстарының тиімділігін арттыру қажеттігін ерекше атап өтті.
Алматы облысы Денсаулық сақтау басқармасының басшысы Ержан Сүлейменов МӘМС жүйесінің азаматтарға сапалы әрі қолжетімді медициналық көмек алуға мүмкіндік беретін маңызды әлеуметтік тетік екенін айтты.
«Алматы облысында тұрғындарды міндетті әлеуметтік медициналық сақтандыру жүйесіндегі өзгерістер мен медициналық көмектің қолжетімділігін арттыруға бағытталған ақпараттық-түсіндіру жұмыстары жүйелі түрде жүргізіліп келеді. Қазіргі таңда негізгі басымдық медициналық ұйымдар арқылы халыққа тікелей әрі түсінікті ақпарат жеткізуге беріліп отыр. Call-орталықтар, әлеуметтік желілер және медициналық ұйымдардың ресми сайттары арқылы дәрілік қамтамасыз ету, МӘМС шеңберінде қызмет алу, сақтандыру мәртебесін тексеру және қарызды өтеу тәртібі жан-жақты түсіндірілуде. Нәтижесінде созылмалы аурулары бар сақтандырылмаған азаматтар саны 18,7 пайызға азайды. Бұл қабылданып жатқан шаралардың тиімділігін көрсетеді», – деді басқарма басшысы.
Сонымен қатар, отырыс барысында облыстық басқарма басшыларының ұсыныс-пікірлері тыңдалып, өңірлерде МӘМС жүйесін тиімді іске асыруға қатысты өзекті мәселелер талқыланды. Жиын қорытындысы бойынша негізгі жұмыс тетіктерін жетілдіру және жоспарланған іс-шараларды кезең-кезеңімен орындау үшін жауапты мамандарға нақты тапсырмалар берілді. Ақпараттық-түсіндіру жұмыстарының маңыздылығы тағы да атап өтілді.
Айта кетейік, 2026 жылдың 1 қаңтарынан бастап Қазақстанда міндетті әлеуметтік медициналық сақтандыру жүйесіне бірқатар өзгеріс енгізіледі. Бұл өзгерістер халықтың әлеуметтік қорғалуын күшейтуге және қаржылық жауапкершілікті басқарудың әртүрлі деңгейлері арасында қайта бөлуге бағытталған.
Атап айтқанда, ресми тіркелген жұмыссыз азаматтардың МӘМС жүйесіне қатысуы сақталады. Алайда 2026 жылдан бастап аталған санат үшін сақтандыру жарналары жергілікті атқарушы органдардың қаражаты есебінен төленетін болады. Осыған ұқсас қаржыландыру тетігі табысы төмен D және E әлеуметтік санаттарына жататын азаматтарға да қолданылады.
Сонымен бірге, жұмыс істемейтін D және E санаттарына жататын тұлғалар үшін жарна төлеу процесі ай сайын жүзеге асырылады. Айдың бірінші күні Еңбек ресурстарын дамыту орталығы көрсетілген санаттағы азаматтардың тізбесін қалыптастырып, Saqtandyrý ақпараттық жүйесіне жолдайды. Осы деректер негізінде Қор аталған тұлғаларға «сақтандырылған» мәртебесін беріп, олардың әлеуметтік санатын ақпараттық жүйеде белгілейді.
