Алматы облысында тасқынға қарсы іс-шаралар аясында 25,6 шақырым арық, 3 шақырым канал және 4,2 шақырым өзен арналары тазартылған. Сонымен қатар, атасжол мен теміржол жолдардың астында орналасқан 16 су өткізу құбыры тиісті техникалық жағдайға келтірілді. Бұл еріген қар және тасқын суларын кедергісіз өткізуге мүмкіндік береді.
Қарды уақытылы шығару үшін облыстың барлық аудандарында, сондай-ақ Қонаев және Алатау қалаларында арнайы қар полигондары белгіленген. Жұмыстар мердігер ұйымдардың қатысуымен жүргізіліп, ауа райының өзгерістеріне жедел әрекет етуге жағдай жасалып отыр.
Өңірдегі гидрологиялық жағдайды тұрақты бақылау мақсатында 42 гидропост жұмыс істейді. Олардың қатарында «Қазгидромет» РМК және «Қазселденқорғау» АҚ бекеттері бар.
Қазіргі уақытта өзендерде мұз кептелістері тіркелмеген, гидрологиялық жағдай қалыпты деңгейде сақталып отыр. Жүргізіліп жатқан жұмыстар су басу қаупін барынша азайтып, көктемгі тасқын кезеңінде тұрғындар үшін қауіпсіз әрі тұрақты жағдайды қамтамасыз етуге бағытталған.
