Бұл – тек техникалық міндеттер ғана емес, сонымен қатар халықтың өмір сапасын арттыруға, кәсіпкерлік, туризм және әлеуметтік саланың дамуына қолайлы жағдай жасауға бағытталған стратегиялық қадамдар.
Бүгінде облыстық Энергетика және сумен жабдықтау басқармасы аудан әкімдіктерімен бірлесіп 127 жобаны іске асыруға кіріскен. Атап айтқанда, 15 жоба – жылумен қамту, 25 – электрмен жабдықтау, 13 – газдандыру, 54 – сумен жабдықтау, ал 20 жоба – су бұру саласына тиесілі. Бұл бағыттардың әрқайсысы өңірдің орнықты дамуына үлес қосатын маңызды тетік саналады.
Жылумен қамту мәселесі – басты назарда.
Биыл Талғар және Еңбекшіқазақ аудандарында 15 модульдік қазандықтың құрылысы басталды. Осы мақсатқа жергілікті бюджеттен 3,08 млрд теңге бөлінді. Жоспарға сәйкес, алдағы жылыту маусымында 52 көпқабатты үй орталықтандырылған жылумен қамтамасыз етіледі. Құрылыс жұмыстары 2025 жылдың қыркүйегінде толық аяқталады деп жоспарланып отыр.
Электрмен қамту бағытында да айтарлықтай ілгерілеу бар.
Жалпы құны 8,1 млрд теңгені құрайтын 25 жоба жүзеге асырылуда. Оның 18-і – алдыңғы жылдан өтпелі жоба болса, 7-еуі – жаңадан басталған. Көптеген нысандар биылғы күзде пайдалануға беріледі. Сонымен қатар, халық пен кәсіпкерліктің артып келе жатқан сұранысын қамтамасыз ету мақсатында жаңа қосалқы станциялардың құрылысы жоспарланған.
Газдандыру бағытында да маңызды жұмыстар қолға алынған.
2025 жылы 13 елді мекенді газбен қамту үшін 11 млрд теңге бөлінді. Бұған дейін кейбір жобаларда техникалық қиындықтар мен мердігерлер тарапынан жіберілген олқылықтарға қарамастан, жұмыстар қарқынды жүргізілуде. Кіші Байсерке, Еламан және Шілібастау ауылдарындағы жобалар кестеге сай іске асуда. Сондай-ақ Қонаев, Алатау қалаларында, Қарасай, Жамбыл және Балқаш аудандарында жаңа құрылыс жұмыстары басталып кетті.
Бірқатар жобалар инвесторларды тарту арқылы жүзеге асырылуда.
Матибұлақ, Достық және Тереңқара ауылдарындағы инфрақұрылым нысандары сәтті аяқталды. Бұл – ынтымақтастық туралы меморандумдар аясында атқарылып жатқан тиімді жұмыстың нақты нәтижесі.
2024 жылы сумен жабдықтау бойынша 43, ал су бұру бағытында 20 жобаның құрылыс-монтаж жұмыстары жүргізілуде.
Жалпы ұзындығы 1300 шақырымнан асатын желілер құрылысына 28,9 млрд теңге бөлінген. Қазіргі таңда 19 жоба мемлекеттік сараптамадан оң қорытынды алды, тағы 66 жоба бойынша жобалық-сметалық құжаттама әзірленіп жатыр.
Аталған жобалар аяқталған соң, өңірдегі су жүйелерінің тозу деңгейі едәуір төмендеп, халық сапалы ауыз сумен тұрақты қамтамасыз етіледі.
Жылу тұтынушыларының 98 пайызын халық құрайды.
Олар үшін жеңілдетілген тарифтер қолданылатыны белгілі. Осыған байланысты жылу жеткізуші мекемелердің қаржылық тұрақтылығын сақтау мақсатында мемлекет тарапынан субсидиялар қарастырылған. 2025–2026 жылдары тұрақты жылыту маусымын қамтамасыз ету үшін 2,5 млрд теңге бөлініп отыр, оның ішінде 1,7 млрд теңгесі — облыстық бюджеттен.
Алматы облысының Энергетика және сумен жабдықтау басқармасының басшысы Айдын Бегімбетов былай дейді:
«Біздің басты міндетіміз – облыс тұрғындарын сапалы және тұрақты коммуналдық қызметтермен қамтамасыз ету. Біз инженерлік инфрақұрылым мәселелерін кешенді түрде шешіп жатырмыз: тозған желілерді жаңғыртып, заманауи технологияларды енгіземіз, жеке инвестициялар тартамыз және жобалардың мерзімі мен сапасына бақылауды күшейтеміз. Бұл – өңірдің орнықты дамуына берік негіз».
Инженерлік инфрақұрылымды дамыту – бұл тек тұрмыстық жағдайды жақсарту ғана емес, сонымен бірге өңірдің экономикалық өсуіне, әлеуметтік тұрақтылық пен инвестициялық тартымдылыққа жол ашатын қуатты серпін.
Әрбір іске асырылған жоба – халықтың жайлы әрі қауіпсіз өміріне қосылған үлес, болашақтың берік іргетасы.
