Әлеуметтік маңызы бар азық-түлік тауарларының баға индексі жыл басынан бері 108,0 пайыз деңгейінде сақталып отыр (Қазақстан бойынша орташа — 108,3%).
Өңірде бағаны тұрақтандыру мақсатында әлеуметтік маңызы бар азық-түлік қоры тұрақты түрде толықтырылуда. Қазіргі уақытта қоймаларда:
10 094 тонна тауар,
16,9 млн дана жұмыртқа сақтаулы.
Жыл сайын халықтың үш айлық тұтынуының 30%-ы көлемінде қор құрылуы — бағаның күрт өсуін болдырмаудың басты құралы. Әсіресе көкөніс өнімдері секілді маусымдық тауарлар бойынша бұл тәсіл тиімділігін көрсетіп келеді.
Сиыр еті мен күнбағыс майына қолжетімді баға
Қысқы-көктемгі маусымда сиыр еті бекітілген бағамен сатылып, нарықтағы бағаның қымбаттауына жол берілмеді. Соның арқасында өңірде сиыр етінің қымбаттауы республика бойынша ең төмен деңгейлердің бірі — 26,4% өсіммен 9-орында.
Күнбағыс майы бойынша да тұрақтандыру қоры жұмыс істеп тұр. Өнім тұрғындарға литріне 576 теңгеден сатылуда. Бұл баға — зауыттың шығару құнынан да төмен. Бағдарлама өңір тұрғындарына майды қолжетімді бағамен сатып алуға мүмкіндік беріп, нарықтағы қысымды азайтты.
Келесі маусымға дайындық
2026 жылғы маусымаралық кезеңде тапшылық болдырмау үшін қала халқының үш айлық тұтынуының 50%-ына тең қор жасақталып жатыр:
Картоп — 3 815 тонна
Сәбіз — 884 тонна
Пияз — 625 тонна
Қырыққабат — 930 тонна
Бүгінде 18 түрлі әлеуметтік тауардың жалпы қоры 7 430 тонна және 16 млн дана жұмыртқа көлемінде сақталуда. Қордың жалпы құны — 4,7 млрд теңге. Оның ішінде көкөніс қоры — қала халқының 3 айлық қажеттілігінің 50%-ын, сиыр еті — 70%-ын жабады.
Тауар сату және қарыз келісімдері арқылы 1 076 млн теңге бос қаражат жиналды. Жыл соңына дейін аяқталатын шарттардан тағы 1 960 млн теңге қайтарылуы күтіледі. Жинақталған қаражат жаңа тауарлық келісімшарттарға бағытталып, бағаны тұрақтандыру шаралары жоспарлы түрде жалғасатын болады.
