Бұл жоба Қазақстан халқының арасында қоғам өмірін жақсартуға бағытталған волонтерлік әрекеттерді жандандырып, игі істер дәстүрін қалыптастыруды мақсат етеді.
Волонтерлік мәдениетті дамыту – қоғамның игілігіне
Жобаның басты мақсаты – қоғамда мейірімділік, өзара көмек пен қолдауды насихаттау, жастар мен азаматтарды волонтерлік қызметке тарту арқылы олардың белсенділігін арттыру. Сонымен қатар, қоғам мүшелері арасындағы бірлік пен ынтымақтастықты күшейту, әлеуметтік және экологиялық мәселелерді шешуге үлес қосу басты міндеттердің бірі болып табылады.
Шара барысында Алматы облысы жастар ресурстық орталығының «Жастар бастамаларын қолдау және волонтерлікті дамыту» бөлімінің басшысы Қабдолдаев Әкежан Ермекұлы 1 наурыз – «Алғыс айту» күніне орай жыл басынан бері белсенділік танытқан волонтерлерді құттықтап, оларға алғыс білдірді. Ең үздік волонтерлер марапатталып, олардың қоғамға қосқан үлесі ерекше аталып өтті.
Сонымен қатар, «Jastar club» волонтерлік тобына жаңадан қосылған еріктілерді қабылдау рәсімі өтті. Бұл жас буынның белсенді азаматтық ұстанымын қалыптастыруға, қоғамға пайдалы істерге жұмылдыруға жасалған тағы бір қадам болды.
Бүгінде Алматы облысы көлемінде 2000-нан астам волонтер қоғам өміріне белсенді араласып, әлеуметтік және экологиялық бастамаларға атсалысып келеді. «Игі істер марафоны» сынды жобалар қоғамда қайырымдылық пен ынтымақтастықты нығайтып, волонтерлік мәдениетті дамытуға септігін тигізуде.
Бұл бастама алдағы уақытта да өз жалғасын тауып, көптеген игі істердің атқарылуына серпін беретіні сөзсіз.
