Жантүршігерлік жағдай туралы ақпарат әлеуметтік желіде тарап, қоғам наразылығын тудырды. Облыстық Полиция департаменті бұл оқиғаны растады.
Желідегі мәліметтерге сүйенсек, ер адам соққыға жыққан әйелдің мұрны сынған, құлақ тұсынан жарақат алған және соққы салдарынан есту жүйесі зақымданған. Қазір жәбірленуші ауруханада ем қабылдап жатыр.
Оқиға кезінде әйелдің қасында жақын туыстары болмағаны, ал күйеуі көмек беруден бас тартқаны хабарланды. Сонымен қатар, дәл сол күні енесі үйден қашып кеткені де белгілі болған. Әйелді күйеуінің қолынан мектептегі сыныптастары құтқарып қалған.
Туыстарының айтуынша, ер адам есірткіге тәуелді болған. Әйел оның үстінен полицияға арыз жазбақ болған кезде ері тарапынан соққыға жығылған. Бұл дерек те құқық қорғау органдарының назарына ілінді.
Алматы облыстық Полиция департаменті бұл оқиға бойынша ҚР Қылмыстық кодексіне сәйкес қылмыстық іс қозғалғанын мәлімдеді. Қазір күдікті уақытша ұстау изоляторына қамалған.
«Сотқа дейінгі тергеп-тексеру аясында оқиғаның мән-жайы жан-жақты әрі объективті түрде зерттелуде. Қажетті тергеу амалдары жүргізіліп жатыр. Жиналған материалдар негізінде заң талаптарына сай түпкілікті процессуалдық шешім қабылданады», – делінген ведомство хабарламасында.
Қазіргі таңда тергеу амалдары жалғасып жатыр. Қоғам белсенділері мен желі қолданушылары бұл оқиғаға бейжай қарамауға шақырып, жәбірленушіге құқықтық және психологиялық көмек көрсетілуі тиіс екенін айтуда.
