Кешен 2016 жылы ашылып, соңғы үлгідегі 5-ші буынды жылыжай технологиясымен жабдықталған.
Жоба іске қосылған күннен бастап өңірдің ауыл шаруашылығы саласында серпіліс тудырып, нарыққа таза әрі сапалы өнім ұсынуға мүмкіндік берді.
Жылыжай кешенінде өнімдер заманауи гидропоника әдісімен өсіріледі. Бұл – өсімдіктердің топырақсыз, тек табиғи қоректендіргіштер мен су арқылы өсірілуін қамтамасыз ететін технология. Нәтижесінде өнімдер жыл бойы үздіксіз, 24/7/365 режимінде өсіріледі.
Мұнда ешқандай химиялық тыңайтқыштар, пестицидтер және генетикалық түрлендірілген өнімдер (ГМО) қолданылмайды. Барлық өсімдіктерге тек әлемдік сапа стандарттарына сай органикалық қоректендіргіштер (Yara, Haifa) және табиғи шымтезек (Kekkila) беріледі.
Жылыжай кешенінің директоры әрі жобаның бастамашысы Роман Шнайдерман бұл тәсілдің ерекшелігі туралы былай дейді:
«Біздің мақсатымыз – адамдарға шынайы таза әрі пайдалы өнім ұсыну. GREEN ECO өнімдері – ешқандай химиялық өңдеуден өтпейтін, табиғи дәмі мен дәрумендері толық сақталатын жасыл желек. Біз тұтынушыларға тек экологиялық таза әрі әлемдік стандарттарға сай өнім жеткізуді басты қағида етіп қойдық», – дейді ол.
Өнім түрлері және өндіріс көлемі
Кәсіпорын Қазақстанда теңдесі жоқ ассортимент ұсынады. Мұнда 30-дан астам түрлі өнім өндіріледі, соның ішінде:
құмырада өсірілген жасыл салаттар,
микрожасыл өнімдер,
салат қоспалары,
тағамдық гүлдер.
Бүгінде жылыжайда ай сайын 60 тоннадан астам өнім дайындалады. Бұл – жылына 5 миллионға жуық құмыра жасыл желек деген сөз.
Күн сайын 15 мыңнан астам тұқым отырғызылады, ал жылдық көрсеткіш 4,5 миллион тұқымға жетеді.
«Біз өндірістік процесті толықтай автоматтандырдық. Дания, Германия және Италиядан жеткізілген жабдықтардың арқасында әрбір өнім сапа бақылауынан өтеді. Мақсатымыз – ел нарығын толықтай табиғи өніммен қамтамасыз етіп қана қоймай, Қазақстанды таза ауыл шаруашылығы өнімін өндіретін ел ретінде таныту», – дейді кәсіпорын қызметшілері.
Табиғатқа қамқорлық – басты ұстаным
«GREEN ECO» табиғатты қорғауға ерекше мән береді. Кәсіпорынның барлық процестері энергия үнемдеу технологияларымен жұмыс істейді. Артезиан суымен (250 метр тереңдіктен алынған) суару жүйесі енгізілген.
Бұл – экологиялық жүктемені азайтып, табиғи ресурстарды ұқыпты пайдалануға мүмкіндік береді.
Өнімдер +4…+6 °С температурада сақталып, өзінің «тірі дәмін» он тәулікке дейін жоғалтпайды. Әр құмыра жасыл желек дәрумендер мен қоректік заттарға бай, сондықтан тұтынушылардың денсаулығы үшін ерекше пайдалы.
Әлеуметтік маңызы
Жылыжай кешенінде 150-ге жуық адам тұрақты жұмыспен қамтылған. Олардың басым бөлігі – Панфилов ауылының тұрғындары. Бұл ауылдық жердегі жұмыссыздықты азайтып қана қоймай, халықтың әл-ауқатын көтеруге де үлес қосуда.
Талғар ауданын әкімдігінің өкілі кәсіпорынның өңірге тигізген пайдасын атап өтті:
«GREEN ECO» секілді кәсіпорындар ауыл шаруашылығы өнімдерінің сапасын арттыруға ғана емес, ауыл тұрғындарына жаңа жұмыс орындарын ашуға мүмкіндік береді. Бұл – өңірдің әлеуметтік-экономикалық дамуына қосылған үлкен үлес», – деді ол.
Болашаққа жоспар және жаңа кезең
Кәсіпорын қазіргі таңда екінші өндірістік кезеңін іске қосуға дайындалуда. 2023 жылдың соңына дейін жаңа жылыжай алаңын пайдалануға беру жоспарланып отыр.
Жобаның артықшылықтары:
жыл бойы үздіксіз өнім жеткізу,
экологиялық таза өнімге жоғары сұранысты қамтамасыз ету,
өз логистика және дистрибуция жүйесі,
ауыл шаруашылығында инновациялық үлгі болу,
өңірдің азық-түлік қауіпсіздігін нығайту.
Жобаның жалпы құны – 2,1 млрд теңге, оның ішінде 1,5 млрд теңге қаржыландыру қажеттілігі бар. Жоба «Аграрлық несие корпорациясы» АҚ тарапынан мақұлданған және қаржыландыру кезеңін күтуде.
