2025 жылы Алматы облысында балық шаруашылығын жаңғырту, өндіріс көлемін ұлғайту, өнім сапасын жақсарту және су ресурстарын тиімді пайдалану мақсатында кешенді шаралар жүзеге асырылып жатыр. Биыл бұл бағытты дамыту үшін өңірлік бюджеттен 500 миллион теңге бөлінді.
Соның 300 миллион теңгесі аквакультураны дамытуға, балық өсіру шаруашылықтарының өнімділігін арттыруға, заманауи технологияларды енгізуге және тұқымдық жұмыстарды қолдауға бағытталды. Жылдың бірінші жартысында бұл қаражаттың 169 миллион теңгеден астамы игерілді.
Қалған 200 миллион теңге балық шаруашылығы субъектілерінің инвестициялық шығындарын ішінара өтеуге қарастырылған. Бұл бастама кәсіпкерлерді жаңа балық шаруашылықтарын салуға, өндірісті кеңейтуге және жабдықтарды жаңғыртуға ынталандырады.
Өңір биылдың соңына дейін 6,5 мың тонна тауарлық балық өндіруді жоспарлап отыр. Ал 2030 жылға қарай бұл көрсеткішті 20 мың тоннаға дейін жеткізу көзделген. Қазіргі нәтижелер бұл жоспардың нақты әрі қолжетімді екенін дәлелдеп отыр.
2025 жылдың ортасына дейін облыста 4 488 тонна балық өндірілді, оның ішінде 2 мың тоннадан астамы экспортқа шығарылған. Бұл — Алматы облысының балық шаруашылығының өндірістік әлеуеті жоғары екенін және қазақстандық балық өнімдеріне шетелде де сұраныс артып келе жатқанын көрсетеді.
Қазіргі уақытта өңірде 42 тауарлық балық шаруашылығы жұмыс істейді. Сонымен қатар, су айдындарын балықтандыруға да айрықша көңіл бөлінуде. 2025 жылы бұл мақсатқа 40 миллион теңге бөлінген. Күзде жарты миллионға жуық шабақ су айдындарына жіберіледі деп жоспарланып отыр. Бұл биоалуантүрлілікті сақтау мен су ресурстарының тұрақтылығын қамтамасыз ету үшін маңызды қадам болмақ.
Алматы облысы балық шаруашылығын экологиялық жағынан тиімді, экономикалық тұрғыдан табысты, тұрақты сала ретінде дамытуға басымдық береді. Өңір инвестициялық жобаларды қолдауды, аквакультураның заманауи әдістерін енгізуді және ғылыми негізде су ресурстарын басқару жұмысын жалғастырады.
Балық шаруашылығы бүгінде аграрлық саясаттың бір саласы ғана емес, облыс экономикасының жаңа өсу нүктесіне айналып келеді. Бұл сала ауылдық жерлерде бизнесті дамытуға, жаңа жұмыс орындарын ашуға және өңірдің әлеуметтік-экономикалық дамуына айтарлықтай үлес қосуда.
