Алматы облысында өтіп жатқан «Мигрант» жедел-профилактикалық іс-шарасының алғашқы екі күнінде көші-қон заңнамасына қатысты 476 құқық бұзушылық анықталды.
Олардың ішінде 387 шетелдік азамат республика аумағында болу ережелерін бұзған. Оларға қатысты тиісті шаралар қабылданып, 22 шетелдік елден шығарылды.
Сондай-ақ, шетелдіктерге көші-қон талаптарын сақтамай баспана немесе жұмыс ұсынған 78 Қазақстан азаматы әкімшілік жауапкершілікке тартылды. Заңсыз шетелдік жұмыс күшін пайдаланудың бірнеше фактісі анықталып, 11 жұмыс беруші жауапқа тартылды. Операция аясында үш қылмыстық іс қозғалды, деп хабарлады миграциялық полиция қызметкерлері.
Мәселен, көрші елдің бір азаматы шетелдік нөмірлі көлікпен заңсыз жолаушы тасымалдаумен айналысқаны белгілі болды. Ол анықталып, қолданыстағы заңнамаға сәйкес жауапкершілікке тартылды.
