2025 жылы өңірде 20 білім беру нысанына күрделі жөндеу жүргізу жоспарланған. Жобаны жүзеге асыру үшін жергілікті бюджеттен 21,4 млрд теңгеден астам қаражат бөлінді.
Жөндеу жұмыстарының 11-і облыстық құрылыс басқармасы арқылы, ал 9-ы облыстық білім басқармасы арқылы іске асырылуда.
Білім басқармасы жүзеге асырып жатқан 9 нысанның 6-ы «Ауыл – ел бесігі» бағдарламасы аясында қамтылған. Қалған 3 жоба – 2024 жылдан өтпелі нысандар. Бұл мақсатқа жалпы 8 млрд 958 млн теңге қарастырылған, алайда бөлінген қаражат толық көлемде игерілмеген. Қосымша қажетті сома – 2 млрд 229,6 млн теңге.
Өтпелі 6 мектептің екеуінде жұмыстар 30 тамызда аяқталды:
• Еңбекшіқазақ ауданындағы Қ.Т. Рысқұлов атындағы орта мектеп
• Қарасай ауданы, Абай ауылындағы М. Ғабдуллин атындағы мектеп
Ал қалған төрт мектептегі жөндеу 30 қазанға дейін аяқталатыны жоспарланып отыр. Олар:
• Абылайхан атындағы мектеп (Еңбекшіқазақ ауданы)
• Қ.Сәтпаев атындағы мектеп (Еңбекшіқазақ ауданы)
• №12 мектеп (Талғар ауданы, Нұра ауылы)
• №10 мектеп (Талғар ауданы, Белбұлақ ауылы)
Сонымен қатар 3 білім беру нысаны — Балқаш ауданындағы М.Сеңгірбаев атындағы мектеп, Жамбыл ауданындағы Ш.Уәлиханов атындағы мектеп және Талғар ауданы Қызылту ауылындағы №24 мектеп — 2026 жылға өтпелі ретінде белгіленді.
Білім беру нысандарын жаңғырту жұмыстары облыстағы ауыл мектептерінің материалдық-техникалық базасын күшейтуге, оқу сапасын арттыруға және балаларға қолайлы, заманауи орта қалыптастыруға бағытталған.
