Инвестжобаны іске асыру үшін жалпы аумағы 1955 гектар жер телімі бөлінген. Қазіргі таңда оның 700 гектарында мал азықтық дақылдар егуге дайындық жұмыстары жүргізіліп жатыр. Ауыл шаруашылығында тиімділігі жоғары тамшылатып және жаңбырлатып суару технологияларын енгізу көзделген.
Жобаны 2030 жылға дейін кезең-кезеңімен жүзеге асыру жоспарланып отыр. Жалпы инвестиция көлемі 15 млрд теңгеден асады. Нәтижесінде 100 жаңа жұмыс орны ашылады. Ферманың жылдық өндірістік қуаты 13 млн литр сүт өндіруге жетеді.
Инвестжоба аясында екі негізгі технологиялық үдеріс қарастырылған. Оның біріншісі – мал азықтық дақылдарды өсіру, екіншісі – тауарлы сүт өндіру.
Инвестжобаны тұрғындарға таныстыру мақсатында Қонаев қаласының әкімі Асхат Бердіханов арнайы жиын өткізді.
«Өндіріс орындарын ашу, халықты жұмыспен қамту – Қонаев қаласы әкімдігінің басты бағдарларының бірі. Мұндай жобаларды жан-жақты қолдау қажет. Кәсіпорынның іске қосылуы ауыл тұрғындарының әл-ауқатын арттырып, қала экономикасының дамуына оң әсер етеді. Алдағы уақытта Қонаев қаласында 40-тан астам инвестициялық жоба жүзеге асырылмақ», – деді қала әкімі.
Айта кетейік, 2025 жылы Қонаев қаласына 100 млрд теңгеден астам инвестиция тартылған.
