Бұл – аймақ тұрғындарының тұрмыс сапасын арттыруға бағытталған маңызды әлеуметтік қадам.
Соңғы жылдары облыста ондаған елді мекен орталықтандырылған газ желісіне қосылу мүмкіндігіне ие болды.
Тек 2024 жылдың өзінде 17 нысанның құрылысы аяқталып, олардың қатарында Жамбыл ауданын газбен тұрақты қамтамасыз ететін «Қазыбек бек» автоматтандырылған газ тарату станциясы бар.
Бүгінде Алматы облысындағы газ құбыры желілерінің жалпы ұзындығы 4,8 мың шақырымнан асты, ал газ тұтыну көлемі жыл сайын өсіп отыр.
Биылғы жылы облыстың газдандыру жобаларына шамамен 11 миллиард теңге бөлінген. Бұл қаражат есебінен 13 елді мекен мен Қонаев қаласының бес шағынауданына көгілдір отын жеткізілмек.
Қазіргі уақытта Алатау қаласының Даулет шағынауданында, Жамбыл ауданындағы Танбалытас ауылында, Балқаш ауданындағы Ақжар ауылында және Бақанас ауылындағы жаңа тұрғын аймақтақұрылыс жұмыстары басталып кетті.
Алматы облысының энергетика және сумен жабдықтау басқармасының басшысы Айдын Бегімбеков жаңа жобалардың маңыздылығын атап өтті:
“Талғар ауданының Еламан және Кіші Байсерке ауылдарының тұрғындары газға қосылды. Қабылдау актілері рәсімделіп, іске қосу жұмыстары толық аяқталды. Енді үйлерге көптен күткен жылу кірді. Бұл – көгілдір отынды өңірдің әр тұрғынына жеткізу жолындағы маңызды кезең”, – деді ол.
Сарапшылардың пікірінше, газдандыру бағдарламасы тек тұрғындардың өмір сапасын жақсартып қана қоймай, экологиялық ахуалды жақсартуға, сондай-ақ жеке үйлер мен әлеуметтік нысандардағы отын шығынын азайтуға септігін тигізеді.
Қазірдің өзінде газбен қамту көрсеткіші бойынша Алматы облысы республикадағы алдыңғы қатарлы өңірлердің біріне айналып отыр.
