Жер қатынастары саласындағы тексерістер нәтижесінде ауқымды жұмыстар жүргізілуде. Атап айтқанда, 369 мың гектарды қамтитын 1 144 жер телімі мемлекеттік меншікке қайтарылды. Оның ішінде 83 мың гектар жер сот шешімімен, ал 286 мың гектар жер пайдаланушылардың ерікті түрде қайтаруы арқылы мемлекет иелігіне өтті.
Сонымен қатар түсіндіру жұмыстарының арқасында 628 телімде (253 мың гектар) мал шаруашылығы нысандары тіркеліп, жерлер қайтадан айналымға қосылды. Бұдан бөлек, 157 мың гектар болатын 491 жер телімі бойынша да тиісті шаралар қабылданған.
Қалған жер телімдеріне қатысты материалдарды сотқа жіберу, Жер ресурстарын басқару департаментіне тапсыру, иесіз мүлік ретінде тіркеу және келісімшарттарды бұзу жұмыстары жалғасып жатыр.
Соңғы үш жыл ішінде айналымға қайтарылған жерлердің ішінде конкурс арқылы 100 мың гектарды құрайтын 942 телім ауыл шаруашылығы өндірісіне берілген. Сондай-ақ, 5,9 мың гектар болатын 39 жер телімі инвестициялық жобаларды жүзеге асыруға бөлінді.
Бұл шаралардың барлығы өңірдегі жер ресурстарын тиімді әрі мақсатты пайдалану, ауыл шаруашылығы саласының әлеуетін арттыру және жердің игерілмеуіне жол бермеуге бағытталған.
