Шарада «QH Денсаулық жолы» атты қайырымдылық жобасының таныстырылымы да өтті. Бұл жоба шалғайдағы елді мекендердегі халыққа уақытылы онкологиялық скринингтен өтіп, көмек көрсету мақсатында жасалған.
Бүгін облыстық көпсалалы емханаға медициналық кешен берілді. Құрамында медициналық жабдықтармен қамтылған 2 көлік бар. Оның біреуінде компьютерлік томография түсіретін аппарат, екіншісінде ультрадыбыстық зерттеу жүргізетін қондырғы орнатылған.
«Бүгінде Қазақстандағы шалғай ауылдардың халқы түгелдей онкологиялық скринингтен өтуге мүмкіндік аз. Жылжымалы кешендер тұрғындардың денсаулығын тексеруде көп көмек көрсетеді. Әсіресе, онкологиялық ауруға шалдығуға күдігі бар адамдардың ерте бастан емделуіне жол ашады», — деді «Қазақстан халқына» қорының басшысы Болат Жәмішев.
Ендігі аптадан бастап кешен Райымбек, Ұйғыр, Кеген аудандарына жол тартады.
Айта кетейік, Алматы облысында онкологиялық ауруға шалдыққандар тізімінде 10 617 науқас бар. Биыл бұл тізімге тағы 1342 адам енді.
