Желіде тараған бейнежазбада екі көліктің тас жолдың ортасында айнала жүріп, өзге көліктердің қозғалысына кедергі келтіргені және олардың жанында ат мінген адамның ту ұстап жүргені көрінеді. Бұл әрекет жол қозғалысының қауіпсіздігін бұзып, көлік кептелісін тудырған.
Полиция қызметкерлері бейнежазбадағы тұлғаларды анықтап, оларды аудандық бөлімшеге жеткізді. Тексеру барысында құқық бұзушылардың Қарасай ауданының тұрғындары екені анықталды. Олардың туған жылдары – 1999, 2003 және 2007.
«Аталған азаматтарға қатысты ҚР Әкімшілік құқық бұзушылық туралы кодекстің 7-бабы бойынша әкімшілік материалдар толтырылды. Барлық көлік арнайы айып тұрағына қойылып, жүргізушілер көлік құралын басқару құқығынан 6 ай мерзімге айырылды. Сонымен қатар полиция қызметкерлері олармен профилактикалық әңгіме жүргізіп, заң талаптары мен өз әрекеттерінің салдары туралы түсіндірді», — делінген ресми хабарламада.
Құқық қорғау органдары мұндай әрекеттердің тек құқық бұзушылардың ғана емес, басқа да жол қозғалысына қатысушылардың өмірі мен қауіпсіздігіне тікелей қауіп төндіретінін ескертті.
Полиция азаматтарды жол қозғалысы ережелерін қатаң сақтауға және қоғамдық тәртіпті бұзатын әрекеттерден бас тартуға шақырды.
