2025 жылдың алғашқы жартыжылдығында Алматы облысында 331 мыңнан астам ішкі турист демалды. Бұл көрсеткіш өткен жылдың сәйкес кезеңімен салыстырғанда 56 пайызға көп.
Шетелдік туристер саны да өсіп, 5 мың адамнан асты. Облыста қонақүйлер мен демалыс орындарының саны 285-ке жетіп, көрсетілген қызмет көлемі 6,4 миллиард теңгені құрады. Бұл — 2024 жылмен салыстырғанда 54 пайызға жоғары.
Туризм саласына салынған инвестициялар көлемі сегіз айда 23,2 миллиард теңгені құрап, 19 пайызға артты. Ал өңірдің жалпы өңірлік өніміндегі туризмнің үлесі 6,2 пайызға жетті.
Алматы облысының туристік брендіне айналған Іле Алатауы, Шарын шатқалы, Көлсай көлдері мен Есік көлі бүгінде елдің ең танымал демалыс аймақтарының қатарында.
Биыл Қонаев қаласындағы №5 жағажай толық абаттандырылып, еліміздегі ең үздік жағажай ретінде танылды.
Сондай-ақ, «Oi-Qaragai Lesnaya Skazka», «Акбулак» және «ASP Arena» сияқты тау курорттары мен демалыс кешендері жыл бойы туристерге қызмет көрсетуде.
Ал «Sokol» автодромы — Орталық Азиядағы тұңғыш автомотоспорттық кешен ретінде халықаралық жарыстарды қабылдауға мүмкіндік берді.
Өңірде жалпы құны 686 миллиард теңге болатын 30 ірі инвестициялық жоба қолға алынған. Солардың қатарында «ASP Arena», «Hilton», «Marriott» және «Degeres District» қонақ үй кешендері, сондай-ақ «Oi-Qaragai» тау курортының кеңейту жобасы бар.
Капшагай су қоймасының жағасында салынып жатқан «La Ville De La Lune» курорт-қаласы халықаралық деңгейдегі жаңа туристік бағытқа айналмақ.
Туристік бағыттарға баруды жеңілдету мақсатында облыста 141 автобус бағыты ұйымдастырылған.
Сонымен қатар, «Алматы – Қонаев» бағытындағы қала маңындағы пойыз тұрақты жұмыс істеп тұр. Бұл Іле–Балқаш аймағына қатынауды айтарлықтай жеңілдетті.
Жақын уақытта Көлсай мен Шарын бағытындағы жолдар жаңартылып, жаңа демалыс алаңдары салынады.
2025 жылы Алматы облысы өз туристік әлеуетін халықаралық аренада кеңінен таныстырды. Өңірдің мүмкіндіктері ITB China 2025, KITF 2025 және Страсбургтегі Еуропа Кеңесінің сессиясы кезінде көпшілік назарына ұсынылды.
Бұдан бөлек, «Tengri Ultra» марафонының 10 жылдығы, «Apricot Fest» фестивалі, Қазақ-Үнді туристік форумы және Қытайдың Хунань провинциясымен роуд-шоу өңірдің оқиғалық және халықаралық туризмін дамытуға серпін берді.
Қазіргі таңда Алматы облысында туризмді кешенді дамытуға арналған 2025–2029 жылдарға арналған жоспар әзірленіп жатыр. Онда Іле Алатауы, Көлсай және Шарын ұлттық парктерінде экотуризмді дамыту, жаңа инженерлік инфрақұрылым салу және туристік қызмет сапасын арттыру көзделген.
