Аймақтың әлеуметтік-экономикалық даму көрсеткіштері өңірдің жүйелі дамып келе жатқанын дәлелдеп отыр.
Экономиканың жетекші рөлін өнеркәсіп саласы иеленуде. Өнім көлемі 1,6 триллион теңгеден асып, өткен жылмен салыстырғанда 8,2 пайызға өсті. Бұл Алматы облысының ірі индустриалды орталық ретіндегі мәртебесін тағы бір айқындап берді. Кәсіпорындар өндіріс көлемін тұрақты түрде арттырып, жаңа қуаттарды іске қосуда. Сонымен қатар, индустриалды аймақтарды игеру қарқынды жүріп жатыр.
Ауыл шаруашылығы да өсім көрсетіп отыр. Жалпы өнім көлемі 385,4 миллиард теңгеге жетіп, нақты көлем индексі 102 пайызды құрады. Өсу қарқыны бірқалыпты болғанымен, аграрлық сектор өңірдің әлеуметтік тұрақтылығын қамтамасыз етуде ерекше орынға ие. Бұл ауыл халқының тұрмысын жақсартуға, азық-түлік қауіпсіздігін қамтамасыз етуге ықпал етуде.
Құрылыс саласында айтарлықтай серпіліс байқалды. Орындаған жұмыстардың көлемі 219 миллиард теңгеден асып, өсім 22,3 пайызды құрады. Облыста 820 мың шаршы метр тұрғын үй пайдалануға берілді. Бұл өткен жылмен салыстырғанда 20 пайызға артық көрсеткіш. Мұндай қарқын тұрғын үй қорын жаңартуға, демографиялық өсім мен урбанизацияға дер кезінде жауап беруге мүмкіндік беруде.
Инвестиция саласында да айтарлықтай жетістіктер бар. Қаңтар–тамыз айларында негізгі капиталға 620 миллиард теңгеге жуық инвестиция тартылып, өсім 17 пайызды көрсетті. Бұл инвесторлардың сенімі мен өңірдің бизнес үшін тартымдылығын айқын көрсетіп отыр.
Сауда саласы да жоғары көрсеткішке қол жеткізді. Нақты көлем индексі 120 пайызға жетті. Бұған логистикалық инфрақұрылымның кеңеюі және Ресей мен Қытаймен сыртқы экономикалық байланыстардың жандана түсуі ықпал етті.
Көлік қызметтері көлемі 9 пайызға өсіп, 328 миллиард теңгеге жетсе, байланыс қызметтері 11,8 пайызға артты. Бұл халықтың цифрлық технологияларға деген сұранысының артып келе жатқанын байқатады.
Өңірде инфляцияға бақылау сақталуда. Тұтыну бағаларының индексі 108,4 пайызды құрап, орташа республикалық деңгейден (108,8%) төмен болды. Ең жоғары өсім ақылы қызметтерде байқалғанымен (+11%), азық-түлікке жатпайтын тауарлар бағасының бірқалыпты көтерілуі жалпы жағдайды тұрақты ұстап тұр.
Мемлекеттік бюджет кірістері 743,4 миллиард теңге жоспарында 99,1 пайызға орындалды. 736,6 миллиард теңге түскен болса, жергілікті бюджет кірістері жоспардан асыра орындалды (103%). Шығыстар 587 миллиард теңгеге жетіп, оның 94 пайыздан астамы игерілді.
Еңбек нарығындағы жетістіктер де көңіл қуантады. Сегіз айдың ішінде 44,3 мың жаңа жұмыс орны ашылып, оның 32 мыңнан астамы тұрақты болды. Бұл экономикалық өсімнің халықтың әл-ауқатына тікелей ықпал етіп отырғанын көрсетеді.
Сегіз айдың қорытындысы бойынша Алматы облысы теңгерімді әрі қарқынды дамып келеді. Өнеркәсіп пен құрылыс – өсімнің негізін қалап, ауыл шаруашылығы тұрақтылықты қамтамасыз етуде. Сауда мен қызмет көрсету саласы жедел қарқын алып, инвестициялар аймақтың бизнес үшін тартымдылығын дәлелдеуде. Ең бастысы – жаңа экономикалық жетістіктер жаңа жұмыс орындарына, халықтың табысының артуына және өмір сүру сапасының жақсаруына айналып отыр.
