«Елімізде сайлауалды науқан «Сайлау туралы» Заңы аясында жүргізіледі. Әкімшілік құқық бұзушылық туралы Кодексте (ӘҚБтК) сайлау алдындағы үгіттің тәртібі мен шарттарын бұзғаны үшін 9 бап көзделген:
— сайлау алдындағы үгiтті оған тыйым салынған кезеңде жүргiзу (102 – бап: 15 не 35 АЕК көлемінде айыппұл);
— сайлау алдындағы үгітті жүргізу құқығына кедергі келтіру (103-бап: 20 не 50 АЕК дейінгі айыппұл);
— БАҚ арқылы сайлау алдындағы үгітті жүргізу шарттарын бұзу (112-бап: 2 не 50 АЕК айыппұл)», — деді Берік Адамов.
Сонымен қатар ол БАҚ арқылы үгіт жүргізу шарттарын да атап өтті.
«Үгіт жүргізу кезеңінде болуы мүмкін әкімшілік құқық бұзушылықтардың басқа да құрамдарын атап өткім келеді:
— анонимдік үгiттеу материалдарын дайындау немесе тарату — 25 АЕК айыппұл;
— үгіт материалдарын қасақана жою, бүлдіру — 15 АЕК айыппұл;
— сайлауға байланысты қоғамдық пiкiрге сауал салуды жүргiзу шарттарын бұзу — 10 не 30 АЕК айыппұл;
— сайлау алдындағы үгітті жүргізу шарттарын бұзу — 20 не 30 АЕК айыппұл», — деді прокурор.
Берік Адамовтың айтуынша, азаматтар өздерінің сайлау құқығын бұзған жағдайда өз бетінше тікелей сотқа да жүгіне алады.
«Әкімшілік жауаптылықпен қатар сайлау заңнамасын бұзғаны үшін қылмыстық жауаптылық та көзделген.
Ол сайлау құқықтарын жүзеге асыруға немесе сайлау комиссияларының жұмысына кедергі келтіруге қатысты ҚК-нің 150-бабы. Және сайлау құжаттарын бұрмалау немесе дауыстарды дұрыс есептемеуге байланысты ҚК-нің 151-бабы», — деді облыс прокуроры.
Айта кетейік, сайлауалды үгіт науқаны 21 қазанда басталып, 19 қарашада аяқталады. Қазіргі уақытта Алматы облысы бойынша сайлау заңнамасын бұзу фактілері тіркелген жоқ.
