Аталған халықаралық жиынға Алматы облысынан арнайы делегация қатысуда. Делегация құрамында Қазақстан халқы Ассамблеясының алты өкілі бар, деп хабарлайды Qazyr.kz.
Сессия аясында Алматы облысының делегациясы Еуропа Кеңесінің штаб-пәтерінде «Қазақ бұрышы» атты мәдени алаң ұйымдастырды. Бұл бастама – Алматы облысы әкімдігі мен Францияның Эльзас өңіріндегі Еуропалық қауымдастық арасындағы ынтымақтастық туралы меморандум аясында жүзеге асырылып жатқан нақты жобалардың бірі. Айта кетейік, аталған құжат 2024 жылы Мемлекет басшысының Парижге жасаған мемлекеттік сапары қарсаңында қол қойылған болатын.
«Қазақ бұрышында» еліміздің мәдениеті мен дәстүрлерін кеңінен таныстыратын бірегей көрме ұйымдастырылды. Қонақтардың назарына фото және бейнематериалдар, кітаптар, ақпараттық брошюралар, ұлттық нақыштағы қолөнер бұйымдары, қазақтың дәстүрлі киімдері мен ұлттық тағамдары ұсынылды. Мәдени алаң Қазақстанның бай мұрасын, фольклорын және туристік әлеуетін насихаттауға бағытталған.
Сессия барысында Қазақстан халқы Ассамблеясының 30 жылдығы да ерекше атап өтілді. Бұл институт еліміздегі этносаралық келісімді нығайтуда және азаматтардың құқықтары мен бостандықтарын қамтамасыз етуде маңызды рөл атқарып келеді.
Алматы облысы «Қоғамдық келісім және даму орталығы» КММ басшысы Елбосын Абай:
«Страсбургте Еуропа Кеңесі Парламенттік Ассамблеясының сессиясы аясында ұлттық мәдениетімізді таныстыру мақсатында «Қазақ бұрышын» ұйымдастырдық. Қазақстан халқы Ассамблеясының атынан Еуропа жұртшылығына халқымыздың тағамдарын, фольклорын, қолданбалы өнер туындыларын және ұлттық салт-дәстүрлерімізді таныстырып жатырмыз», – деді өз сөзінде.
Іс-шара барысында домбырашы Е. Дүкеннің орындауындағы халық күйі «Көроғлы» еуропалық қонақтар мен қазақ диаспорасы өкілдерінің ерекше ықыласына бөленіп, ұлттық өнерге деген қызығушылықты арттырды.
