Алматы облысы ауыл шаруашылығының мал шаруашылығы саласында республика бойынша үздік көрсеткіштерге ие. Құс басы бойынша – 1-орында, қой мен ешкі саны бойынша – 3-орында, ал ірі қара мал, сүт және жұмыртқа өндірісі бойынша – 4-орында. Бұл туралы Алматы облысының әкімі Марат Сұлтанғазиев Орталық коммуникациялар қызметінде өткен брифингте мәлімдеді, деп хабарлайды alataunews.kz.
Алматы облысында құс етін өндіру саласы қарқынды дамып келеді. Өңірде ет өндіретін 7 құс фабрикасы жұмыс істейді. Құс етін өндіруде облыс республикада 1-орында тұр. Жылдық өндіріс көлемі 114,3 мың тонна, бұл Қазақстан бойынша жалпы өнімнің үштен бірін құрайды (368,0 мың тонна). Болашақта өндірісті арттырып, өңдеу деңгейін 70%-ға дейін жеткізу жоспарлануда.
Сүт өңдеу кәсіпорындарының толық жүктелуін қамтамасыз ету үшін облыста жалпы құны 15 млрд теңге болатын 13 инвестициялық жоба жүзеге асырылуда. Бұл жобалар аясында 5,2 мың бас асыл тұқымды ірі қара мал сатып алынып, сүт өндірісі 31 мың тоннаға арттырылмақ.
Ет өңдеу: заманауи технологиялар және жаңа өндіріс орындары
Ет өңдеу саласында облыстың жетекші кәсіпорындары – «Первомайские деликатесы», «Барон Фуд», «Макария», «Алель Агро», «Алатау құс» және «Прима құс» жұмыс істейді. Олардың жылдық өндірістік қуаты 70 мың тоннаға жетеді.
Сондай-ақ, «Кеген МясПром» ет комбинатының құрылысы аяқталуға жақын. Жобаның құны 2 млрд теңге, жылдық өндірістік қуаты 3 мың тонна, 50 жаңа жұмыс орны ашылады. Бұл жоба облыстың ет өңдеу деңгейін қазіргі 61,6%-дан 63,3%-ға арттыруға мүмкіндік береді.
2023 жылдың жетістіктері: 8 жаңа нысан
Жыл басынан бері ауыл шаруашылығы саласында 5,1 млрд теңгеге 8 нысан іске қосылып, 130 жаңа жұмыс орны ашылды. Солардың ішіндегі маңызды жобалар:
1. «Оспанова Девелопмент» (Қонаев қаласы) – жылына 10 мың тонна балық өнімін өндіру жобасы. Инвестиция көлемі: 1,7 млрд теңге.
2. «БалтабайАгро» (Еңбекшіқазақ ауданы) – 6 мың бас малға арналған бордақылау алаңын кеңейту. Жоба құны: 500 млн теңге.
3. «Биокарбон» (Балқаш ауданы) – күріш қауызынан 2 мың тонна отындық брикет өндіру. Құны: 348 млн теңге.
4. «Саин» шаруа қожалығы (Еңбекшіқазақ ауданы) – 20 га алма бағын кеңейту. Құны: 400 млн теңге.
5. «ИПЗ» (Еңбекшіқазақ ауданы) – консерві өнімдерін өндіру зауытын кеңейту. Жоба құны: 600 млн теңге.
6. «Асыл» шаруа қожалығы (Райымбек ауданы) – 30 млн теңгеге балық шаруашылығын дамыту.
7. «Green Eco» (Талғар ауданы) – 300 млн теңгеге жылыжайды кеңейту.
8. «ФирсФиш» (Еңбекшіқазақ ауданы) – 1,2 млрд теңгеге балық өсіру жобасы.
Алматы облысы ауыл шаруашылығында өңірлік көшбасшылықты сақтап, өндіріс көлемін арттыруда тұрақты жетістіктерге қол жеткізіп келеді. Жаңа жобалар аймақтың экономикалық әлеуетін нығайтып, тұрғындардың әл-ауқатын арттыруға үлес қосуда.
