Аталған жоба Экономикалық ынтымақтастық және даму ұйымының «Даму үшін ресми көмек беру» бағдарламасы (Oda – Official Development Assistance) бойынша жүзеге асырылады. Және жобаның ресми атауы – «Қазақстанның лифт өнеркәсібіне арналған R&D паркі».
«Ofe Elevators» компаниясының президенті Ham Young Cher (Хам Ен-Чхер) айтуынша, «R&D» лифт орталығы бірнеше мақсатта салынады:
1. Өндірістің қазақстандық әлеуетін нығайту және лифт өнеркәсібін дамыту;
2. Сапалы кореялық-қазақстандық өнімді шетелдік нарықтарға бірлесіп шығару;
3. Лифтілер мен оны құраушы жиынтықтардың қауіпсіздігін сынаудың қазақстандық жүйесін жетілдіру.
«Қонаев қаласында парк салу үшін Кореяның озық мамандары жоба әзірледі. Оның ішінде, Кённам технопаркі, кореялық жеделсаты университеті, электрлі және электронды құрылғыларды жасайтын университеті бар», — деді Хам Ен-Чхер өз сөзінде.
Компания президентінің сөзіне сүйенсек, бизнестің орта мерзімді және ұзақ мерзімді мақсаттарына R&D Лифт орталығының құрылысы және ауданы 3300 м2 болатын ғылыми-зерттеу орталығы (R&D) кіреді. Сондай-ақ биіктігі 60 м болатын 4 шахта мұнарасының құрылысы, қауіпсіздік компоненттерін сынау орталығын құру жоспарланған.
«Біз Қазақстан нарығы тек Орталық Азия елдеріне ғана емес, Еуропа нарығына да қанат жаяды деп ойлаймыз. «Ofe Elevators» компаниясы «Қазақстанда жасалған» маркасын дамыту үшін аянып қалмайды», — деді компания президенті.
Өз кезегінде Алматы облысының әкімі Марат Сұлтанғазиев бұл жоба болашақ инновациялық жобалардың іргетасы болатынын атап өтті.
«Облыс әкімдігі тарапынан қолдау көрсетілетіні сөзсіз. Инвесторлармен тікелей байланысты облыс әкімінің кеңесшісі Самат Ахилбеков жүзеге асырады», — деді облыс әкімі.
Айта кетейік, жоба құны 30 миллионнан аса АҚШ доллары тұрады. Ол 2023-2028 ж. аралығында іске асырылмақ.
