Алматы облысы әкімінің орынбасары Ғани Майлыбаев жұмыс сапары барысында Талғар ауданының Белбұлақ ауылындағы жалпы білім беретін мектептің күрделі жөндеу жұмыстарының барысымен танысты.
Аталған нысан бойынша «SHEBERBUILD» ЖШС-мен 2023 жылғы 22 маусымда №356 келісімшарт жасалып, мектеп ғимаратына сейсмокүшейту және күрделі жөндеу жұмыстарын жүргізу көзделген. Жобаның жалпы құны — 883,2 млн теңге.
Құрылыс-монтаж жұмыстарына рұқсат Алматы облысының Мемлекеттік сәулет-құрылыс бақылау басқармасы арқылы беріліп, жөндеу мерзімі 2023 жылғы 23 маусымнан 2024 жылғы 23 наурызға дейін, яғни 9,5 ай болып бекітілген.
Алайда, мердігердің жұмыс қарқыны баяу жүруіне байланысты сотқа талап арыз түсіріліп, 2024 жылғы 22 мамырдағы №1912-24-00-2/612 шешіммен «SHEBERBUILD» ЖШС-на 16,6 млн теңге айыппұл салынды. Сонымен қатар, компанияға нысанды толық аяқтау міндеттелді.
Мердігер ұйым 2025 жылғы 10 маусымнан бастап жұмыстарды қайта жалғастырып, бүгінгі таңда келесі жұмыстарды орындаған:
• ішкі әрлеу жұмыстары – 90%,
• сыртқы және ішкі қабырғаларды сылау – 85%,
• шатыр жұмыстары – 100%,
• су және кәріз желілерін тарту – 60%,
• электр желілерін монтаждау – 80%,
• сыртқы ойын алаңын абаттандыру – 30%.
Қазір нысанда 25 жұмысшы еңбек етуде, құрылыс материалдары жеткілікті.
2025 жылғы 13 тамыздағы №1912-25-00-2/1744 сот шешіміне сәйкес, «SHEBERBUILD» ЖШС мектептегі құрылыс-монтаж жұмыстарын ағымдағы жылдың 30 қазанына дейін толық аяқтауға кепілдік берген.
Сонымен қатар, 2025 жылғы 11 қыркүйекте техникалық қадағалау қызметін атқаратын жаңа ұйым — «Bureau TSE» ЖШС-мен №534 келісімшарт жасалды.
Нысанды аяқтауға 312,1 млн теңге қаражат бөлінген. 2025 жылғы 29 қыркүйекте мердігермен қосымша келісім жасалып, жұмыстар жалғасуда. Алайда бөлінген қаражат қазіргі уақытта әлі аударылмаған.
Сот шешіміне сәйкес, «SHEBERBUILD» ЖШС 2025 жылғы 30 қарашаға дейін мектепті толық аяқтап, пайдалануға беруге міндетті.
