«Департаменттің кезекті отырысында салықты есептеудегі бірқатар мәселелер талқыланды. Атап айтқанда, 2022 жылы азық-түлік дүкендері үшін қосымша құн салығын (ҚҚС) есептеудегі айналымның ең төменгі мөлшері 20 мың АЕК-ні құрады. Яғни, айналымы 61 260 000 теңгеден аспайтын кәсіпкерлер бұл салықтан босатылған. Ал жалпы кассадан түсетін табыс (маржа) небәрі 15-20%», — делінген баспасөз хабарламасында.
Департамент мамандарының айтуынша, егер азық-түлік дүкендері ҚҚС бойынша есепке алынса, онда салықты төлеу үшін тауардың құны кем дегенде 12% өседі. Бұл халық арасында әлеуметтік шиеленісті тудырады. Сондай-ақ көптеген кәсіпкерлер жабылуға немесе «көлеңкеге кетуге» мәжбүр болады.
«Осы мәселеге байланысты еліміздің салық заңнамасына өзгерістер енгізу ұсынылды. Нақтырақ айтқанда, ҚР Салық кодексінің 394-бабының (Қосылған құн салығынан босатылған, тауарларды, жұмыстарды, көрсетілетін қызметтерді өткізу бойынша айналымдар) 51-тармағы ретінде тамақ өнімдерін, сусындарды және темекі өнімдерін бөлшек саудада сатумен айналысатын бизнес өкілдерін ҚҚС-дан босату туралы толықтырулар енгізу қажеттілігі ұсынылды», — деп жазды департаменттің баспасөз қызметі.
Кез келген тұрғынның, кәсіпкердің өтініші dazrk_alm@azrk.gov.kz электронды поштасында қабылданады.
