Аталған басқосуды облыстық дін істер басқармасы мен жастар ресурстық орталығы ұйымдастырды. Алматы облыстық дін саласындағы мәселелерді зерттеу орталығының директоры Сағыныш Жаңабайдың айтуынша, мұндай шараны өткізудегі басты мақсат — руханият, салт-дәстүр, әдеп, көркем мінез, болашақ тақырыптарын қамту арқылы жастардың діни сауаттылығын арттыру.
Шараға келген жастар өз ойларын ортаға салып, түрлі тақырыпта толғандырған сұрақтарын қойды. Дінтанушымен еркін тілдесіп, сұхбат құрды. Көкейіндегі сауалдарға жауабын алды.
«Бұл кісінің сөздері әсерлі және де жеңіл жеткізіледі. Әр мәселенің шешімін «болмайды, болмайды» деп қатаң түрде сөйлемей, жұмсақтау айтып, жетесіне жеткізеді. Нұрлан имамның ерекшелігі – сөз арасына әзіл қосу арқылы астарлап түсіндіруі», — деді жиынға қатысқан жастың бірі Мадина Ералықызы.
Ал имамның өзі мұндай кездесуді ұйымдастыру – ел тұтқасын ұстар жастардың адал, ақ жолда жүруіне өз септігін тигізетінін айтады.
«Жастарымыздың жүректегі ішкі сезімдері, отансүйгіштігі, елге деген махаббатының мықты болуы және келешекте елдің адал азаматы болуына мұндай кездесулердің қосар үлесі көп. Игілікті көздейтін жүздесулердің бастамасы болған басшылыққа ризашылығымды білдіремін», — деді Нұрлан имам Байжігітұлы.
Кездесу екі сағатқа созылды. Басқосуға 450-ге жуық адам қатысты.
