Вице-министр қызмет алушылармен кездесу барысында ҚР Әлеуметтік кодексіне енгізіліп жатқан өгерістердің басым бағыттары туралы сөз қозғады.
«Қазіргі таңда елімізде Әлеуметтік кодекс жобасына өзгерістер енгізіліп жатыр. Өзгерістің басым бағытының бірі — интернат-үйлерде қызмет көрсетуден бөлек, қызмет алушылар тұрғылықты мекенжайындағы шағын орталықтарда қызмет ала алатындай мүмкіндіктер қарастырылып отыр», — деді Ақмәди Сарбасов.
Вице-министрдің айтуынша, екінші бағыт — арнаулы әлеуметтік қызмет (АӘҚ) көрсетудің проактивті форматқа көшуі. Ол үшін арнайы қызметке мұқтаж азаматтардың бірыңғай әлеуметтік тіркелімі құрылады. Нәтижесінде ел аумағы бойынша қажеттілік карталары қалыптастырылып, қызметтердің қолжетімділігі айқындалады.
«Үшінші басым бағыт туралы айтар болсақ, бүгінде жалпы тарифтердің орнына арнайы әлеуметтік қызметтерді жан басына шаққандағы қаржыландыру қағидатын енгізу көзделіп отыр. Ал Алматы облысына келсек, мұнда жағдай бірқалыпты. Дегенмен, проблема да жоқ емес. Оның бірі – жұмыссыздық. Қазір осы орталықтан шыққан кейін кәсіпорындарды аралаймыз. Содан соң облыстағы біздің министрлікке қарасты департаменттің өкілдерімен жолығамыз. Жиналыс барысында өңірдегі мәселелер талқыланатын болады», — деді орталықта тілшілерге сұхбат берген вице-министр.
Арнайы әлеуметтік мекеменің жұмысымен танысқан соң вице-министр «Маревен Фуд Тянь-Шань» ЖШС және «АЯМ» ЖШС жұмыскерлерімен кездесіп, Әлеуметтік кодексте азаматтарды әлеуметтік қолдау шараларының күшейтіліп жатқаны туралы егжей-тегжейлі айтып берді.
Анықтама: Қазіргі таңда «Шарапат» арнаулы әлеуметтік қызметтер көрсету орталығында 128 адам қызмет алады. Соның ішінде зейнеткерлер саны – 82, мүмкіндігі шектеулі азаматтар саны – 46. Мұнда 108 маман қызмет етеді.
«Маревен Фуд Тянь-Шань» ЖШС – 2018 жылы ашылған Вьетнам-жапондық тауар-өндірістік компания. Негізінен тез дайындалатын кеспе шығарады. Қуаттылығы жылына 85 мың тонна өнім өндіруге жеткілікті.
«АЯМ» ЖШС-нің негізі 1993 жылы қаланған. Бұл кәсіпорын құрғақ таңғы ас даярлаумен айналысады. Өндірісте 189 адам қызмет етеді.
Посмотреть эту публикацию в Instagram
