Бұл бастама Қазақстанда 2025 жылдың Еңбек адамдары жылы болып жариялануына орай ұйымдастырылып отыр.
Президент Қасым-Жомарт Тоқаев өзінің Жолдауында: «Еңбек адамы – мемлекеттің дамуының негізі. Сондықтан біз жұмысшы мамандықтарының беделін көтеріп, жастарды сұранысқа ие кәсіптерді меңгеруге ынталандыруымыз керек. Сондай-ақ олардың кәсіби дамуына барлық жағдайды жасап, еңбек адамының мәртебесін нығайту арқылы ел экономикасын жаңа деңгейге көтеруге міндеттіміз», – деп атап өткен болатын.
Алдағы шара осы идеяның нақты көрінісін көрсетпек. Алматы облысы Өңірлік коммуникациялар қызметінде өткен брифингте «Даулет-Бекет» ЖШС директоры Сыдық Даулетов оқиғаның мәдени және экономикалық маңызына тоқталды.
«Біздің кәсіпорында 200-ден астам адам жұмыс істейді, ал түйе саны 5 мыңнан асады. Біз шұбат, құрғақ сүт және жүн өнімдерін өндіріп, жыл сайын ішкі нарыққа және экспортқа жеткіземіз. Жаңа рекорд өңірдің дәстүрлі байлығы мен еңбек адамдарының еңбегі әлемдік деңгейге шығуға қабілетті екенін дәлелдейді. Бұл агротуризмді дамытуға серпін беріп, экономикаға жаңа дем береді,» – деді ол.
Ұйымдастырушылардың айтуынша, түйе керуені тек рекорд жаңартумен шектелмейді. Ол өңірдің жаңа мәдени символына айналып, ұлттық бірегейлікті нығайтуға қызмет етпек. Алматы облысы Мәдениет басқармасының басшысы Данияр Әлиев бұл бастаманың халықаралық маңызын ерекше атап өтті.
«Ақшидегі керуен – ұлттық бірлік пен мәдени мұраның символы. Біз бұл шараға мыңдаған турист келеді деп күтеміз. Ол өңірдің мәдени брендингіне айналып, агротуризмді дамытудың жаңа көкжиегін ашады. Еңбек адамдары жылында біз дәстүрлеріміздің де жұмыс орындарын құрып, қоғам бірлігін нығайтып, Қазақстанды әлемдік аренаға шығара алатын ресурс екенін көрсетеміз», – деді ол.
Мерекелік бағдарлама аясында халық күйлері мен әндері орындалып, заманауи әртістердің өнері ұсынылады. Шараның шарықтау шегі – әлемдегі ең үлкен түйе керуенінің Гиннестің рекордтар кітабына тіркелуі болмақ.
