Облыстық жолаушылар көлігі және автомобиль жолдары басқармасының мәліметіне сүйенсек, соңғы 3 жылда өңірдің автожолдардын жөндеуге 54,4 млрд. теңге қаражат бөлінген.
Сондай-ақ жергілікті автомобиль жолдары желісіне қосымша 8,1 млрд. теңге бөлінген. Алайда, өңірдегі автомобиль жолдарының сапасы мен жөндеуге бөлінген қаражатына сай болмай отыр.
Қылмыстарды тергеу нәтижесінде түрлі бұзушылықтар анықталған. Әсіресе, мердігер компаниялар мемлекет қаржысын қалтасына басып қалу мақсатында түрлі айлаға барған.
Жедел-тергеу жұмыстары жолдарды салуға, жөндеуге және жол инфрақұрылымын дамытуға бөлінген бюджет қаражатын жұмсау саласында сыбайлас жемқорлыққа итермелейтін бірқатар кемшіліктер барын көрсетіп отыр. Мәселен, 2019 жылдан бері бұл салада 20 қылмыс тіркелген.
«Инфроқұрылым саласында ұрлық және парақорлық кең етек жайып отыр. Жемқорлыққа жол бермеу мақсатында республикалық деңгейде «Әділдікті талап ет!» жобасы қолға алынып отыр. Жобаның басты мақсаты – қоғам арасында жемқорлыққа төзімсіздік ортасын қалыптастырып, бұл үрдіске ел азаматтарын барынша жұмылдыру. Аталмыш іс-шара жемқорлықтың болуы немесе орын алуы мүмкін деген, қоғамды алаңдататын мәселелердің кең ауқымын кезең-кезеңімен қамтитын болады», – деп атап өтті Жетісу облысы бойынша Сыбайлас жемқорлыққа қарсы қызмет басшысының бірінші орынбасары Тимур Темірәлиев.
Жоба аясында автожол саласындағы мәселелерге тоқталып, жолдарды салу, жөндеу және күтіп ұстау барысындағы жемқорлық тәуекелдерін анықтауға назар аударылатын болады.
Айта кетерлігі тұрғындар науқанға «Adildik.kz» веб-сайты арқылы қосылып, 1463 Call center бойынша Қазақстан автожолдарын салу, жөндеу және күтіп ұстау саласындағы жемқорлық туралы ақпаратты 15 тамыздан бастап хабарлай алады.
