Ведомство мәліметінше, Мемлекет басшысының тапсырмасына сәйкес 2023 жылдан бастап бес жыл ішінде базалық зейнетақының ең төменгі мөлшерін ең төменгі күнкөріс деңгейінің 70 пайызына дейін, ал ең жоғары мөлшерін 120 пайызына дейін кезең-кезеңімен арттыру көзделген.
Осыған сәйкес, 2026 жылғы 1 қаңтардан бастап базалық зейнетақының ең төменгі мөлшері 35 596 теңгені (ең төменгі күнкөріс деңгейінің 70 пайызы), ал ең жоғары мөлшері ең төменгі күнкөріс деңгейінің 110 пайызынан 118 пайызына дейін өсіп, 60 005 теңгені құрады.
Мемлекеттік жәрдемақылар мөлшері де артты
Министрлік мәліметінше, бірқатар мемлекеттік жәрдемақылардың мөлшері ұлғайтылды. Атап айтқанда:
-
1, 2, 3 бала дүниеге келгенде берілетін жәрдемақы 149 416 теңгеден 164 350 теңгеге дейін өсті;
-
4 және одан да көп бала туған жағдайда төленетін жәрдемақы 247 716 теңгеден 272 475 теңгеге дейін артты;
-
Бала санына байланысты көпбалалы отбасыларға берілетін жәрдемақы 4 баласы бар отбасылар үшін 63 030 теңгеден 69 330 теңгеге дейін, ал 10 баласы бар отбасылар үшін 157 280 теңгеден 173 000 теңгеге дейін көбейді;
-
I топтағы мүгедектігі бар адамдарға арналған жәрдемақы 101 702 теңгеден 111 872 теңгеге дейін,
II топтағыларға – 81 362 теңгеден 89 498 теңгеге дейін,
III топтағыларға – 55 474 теңгеден 61 021 теңгеге дейін ұлғайтылды.
Сондай-ақ Мемлекеттік әлеуметтік сақтандыру қоры (МӘСҚ) арқылы төленетін асыраушысынан айырылу және еңбек ету қабілетінен айырылу бойынша әлеуметтік төлемдер де 10 пайызға артты. Бұл төлемдер міндетті әлеуметтік сақтандыру жүйесіне қатысушыларға бюджеттен төленетін мемлекеттік жәрдемақыларға қосымша ретінде жүзеге асырылады.
Министрлік әлеуметтік төлемдердің нақты мөлшері әр азамат үшін жеке есептелетінін айтады. Ол соңғы екі жылда МӘСҚ-қа аударылған әлеуметтік жарналарға негізделген орташа айлық табысқа, еңбек ету қабілетінен айырылу коэффициенттеріне, асырауындағы адамдар санына, міндетті әлеуметтік сақтандыру жүйесіне қатысу өтіліне және табысты алмастыру деңгейіне байланысты болады.
