Ол өткен жылы мемлекет пайдасына 5,2 млн гектар пайдаланылмайтын жер алынғанын еске салды. Оның 4,8 млн гектары жайылымдық жерлер.
«Биыл тағы 5 млн гектар жерді алу жоспарланды», — деді Әлихан Смайылов Үкімет отырысында.
Оның айтуынша, елді мекендердің айналасында орналасқан ауыл шаруашылығы құрылымдарының жерлерін мемлекетке қайтару маңызды. Оларды халыққа немесе жеке қосалқы шаруашылықтардың кооперативтеріне беру қажет.
«Сонымен қатар, жеке мал басының өсуі елді мекендердің айналасындағы жайылымдық ресурстармен шектелетінін түсіну керек. Осыған байланысты жалпы жайылымдарға жүктемені азайту үшін жағдай жасау қажет. Мал шаруашылығын дамыту керек. Қажет болған жағдайда бос жерлерден учаскелер беру қажет», — деп атап өтті Премьер-Министр.
Бұдан бөлек, ол шалғай аумақтарда жергілікті бюджеттің мүмкіндіктерін пайдалана отырып, оларды сумен қамтамасыз ету мәселелерін шешу керектігін айтты.
«Жер қоры аз аудандарда әкімдіктер жеке шаруашылықтарды малды қорада ұстауды ұйымдастырумен кооперативтерге біріктіру мәселелерін пысықтауы қажет», — деп тапсырды ол.
Әлихан Смайылов ауыл шаруашылығы министрлігі қайтарылған жерлерді бөлу мониторингі картасын уақтылы іске қосуды қамтамасыз етуі қажет екенін атап өтті.
Ауыл шаруашылығы және цифрлық даму министрліктері ғарыштық мониторингті қолдана отырып, бос және мақсаты бойынша пайдаланылмайтын жерлердің болуын бағалауды жүргізсін. Ол үшін «JerInSpectr» жерді ұтымды пайдалану мониторингі платформасын енгізу жөніндегі жұмысты жандандыру қажет.
Өңірлердің әкімдеріне Әлихан Смайылов жер пайдалану процестеріне бақылауды күшейтуді және облыстар мен аудандар бөлінісінде жерді қайтару жөніндегі жоспардың уақтылы орындалуын қамтамасыз етуді тапсырды.
