«Жасыл Қазақстан» ұлттық жобасы тұрғындар үшін қолайлы өмір сүру ортасын құруға және елдегі экологиялық жағдайды жақсартуға бағытталған. 2021 жылы ұлттық жобаның міндеттерін жүзеге асыруға 89,3 млрд теңге, осы жылы шамамен 161 млрд теңге қарастырылған», – делінген хабарламада.
«Атмосфералық ауа сапасын жақсарту» міндеті аясында бес жыл ішінде 10 қалада 16 ірі өнеркәсіп кәсіпорындарындағы шығарындыларды 20% азайту көзделіп отыр.
«Алматы ЖЭО-2-ні газға ауыстыру жоспарланған. Бұл ластаушы заттардың шығарындыларын 2025 жылға қарай 80% дейін төмендетуге мүмкіндік береді. Атырау мұнай өңдеу зауытында түтін газын тазалау және қондырғыларда отын газын амин қышқылымен тазарту жұмыстары жүргізіліп жатыр. Бұл ластаушы заттардың шығарындыларын 3,6% төмендетуге мүмкіндік береді. Жалпы, 2030 жылға дейін 9,1% төмендету жоспарланған», — делінген хабарламада.
Экология, геология және табиғи ресурстар министрі Серікқали Брекешев: «Жасыл Қазақстан» ұлттық жобасын іске асыру тұрақты бақылауда, министрліктің жобалық кеңсесі аясында апта сайын мониторинг жүргізіледі», — деді.
