Солтанбай Жарықбасов белсенді өмір салтын ұстанады, ең бастысы — өз принциптерінен айнымайды. 187-ші дауыс беру учаскесіне ақсақал 15 жастағы шөбересі Дамирмен бірге келіп, өз таңдауын жасауға нық ниет білдірді. Тіпті әзілдеп, қай жерге белгі қоятынын алдын ала білетінін де айтты. Айта кету керек, бұл учаскеде оның балалары мен немерелері де дауыс беруде.
«Иә, мен еліміздің тарихындағы қызықты әрі күрделі кезеңдерді бастан өткердім, тәуелсіз Қазақстандағы барлық саяси дауыс берулерге қатыстым. Айтарым, өзгерістерден ешқашан қорықпау керек. Ең бастысы – заман ағымымен бірге қадам басу, сонда бәрі жақсы болады.
Әрине, жастардың тағдыры мені бейжай қалдырмайды. Сондықтан бүгін мен болашақ ұрпақтың игілігі үшін таңдау жасадым. Жастар менің жасымдай ұзақ өмір сүріп, бейбіт әрі бақытты заманда ғұмыр кешсін.
Осы маңызды оқиғамен барша қазақстандықтарды шын жүректен құттықтаймын. Елімізге амандық, халқымызға береке, мемлекетімізге одан әрі гүлдену тілеймін», — деді Солтанбай Жарықбасов.
Ұлы Отан соғысының алғашқы күндерінде-ақ Солтанбай Жарықбасов мектеп қабырғасынан майданға аттанып, Ташкент қаласында кіші командирлер курсын тәмамдайды. Кейін Забайкалье майданында 25-ші механикаландырылған бригада құрамында пулеметшілер бөлімшесінің командирі болып қызмет етеді. Соғыстан кейін туған ауылына оралып, ұстаздық жолды таңдайды. Алдымен Түрген ауылындағы педагогикалық училищені, кейін Қазақ педагогикалық институтының тарих факультетін бітіреді.
Тарих пәні ол үшін тек сүйікті сабақ қана емес, өмірлік миссиясына айналған. Солтанбай Жарықбасов Қазақстан тарихына қатысты материалдарды өмір бойы жинап келеді. Ұзақ жылдар бойы Байтерек ауылдық округінің ақсақалдар кеңесін басқарды. Оның педагогикалық білімі мен ұйымдастырушылық қабілеті қоғамдық жұмыстарда ерекше бағаланды. Туған өңіріндегі ауылдардың әлеуметтік дамуына және жастар тәрбиесіне қосқан үлесі зор.
Бірнеше жыл бұрын оның көптен бергі арманы орындалып, Алға ауылында жаңа мектеп салынды. Ал ауылдың ортасындағы ақ мешіт — Жарықбасовтар әулетінің жерлестеріне жасаған тағы бір игі сыйы.
Жалпы, Солтанбай Жарықбасов — өте бақытты жан. Бүгінде оның 78 немересі, шөбересі және шөпшегі бар.
