Қонаев қаласының әкімі Нұрлан Құматаевтың Республика күнімен құттықтауы
«Құрметті жерлестер!
Қадірлі ағайын!
Баршаңызды еліміздің басты мерекелерінің бірі – Республика күнімен шын жүректен құттықтаймын!
Мемлекет басшысы Қасым-Жомарт Кемелұлы Тоқаевтың бастамасымен бұл мейрам биыл екінші рет аталып өтілуде.
1990 жылы қазан айының 25-і күні Қазақ КСР Жоғарғы Кеңесінің шешімімен «Қаз КСР-нің мемлекеттік егемендігі туралы» декларация қабылданды. Сол сәттен бастап егеменді Қазақстан өзіндік көзқарасы бар жеке мемлекет ретінде таныла бастады.
Қазақстан Республикасы Тәуелсіздік жолында бірқатар өзгерістерден өтіп, Еліміздің даму жоспары, мемлекеттік стратегия мен нақты мақсат белгіленді. Осы орайда, біздің шуақты қаламыз – Қонаев та бұл өзгерістерге өз үлесін қосуда.
Бүгінгі күнге қаламыздың өнеркәсіп көлемі 2%-ға өсіп, 105 млрд. теңгені құрады. Салықтар мен басқа да міндетті төлемдер бойынша жалпы бюджетке 107,6 млрд. теңге түсті. Ауылшаруашылығында 10,3 млрд. теңгенің өнімдері өндірілді, немесе 98,7%. Құрылыс жұмыстарының көлемі 78,4%-ға өсіп, 15,6 млрд. теңгені құрады.
Өздеріңізге мәлім, Президентіміздің қолдауымен биыл тамыз айында Қонаев қаласының Бас жоспары бекітілді. Ендігі кезекте жаңа әкімшілік-тұрғын үй орталығын салуды көздейтін, 5 жылға есептелген Қонаев қаласын дамытудың Кешенді жоспары қабылданды.
Бұл құжаттар Іле өзені өрнектеген шаһарамыздың дамуына тың серпін беріп, қала тұрғындарына қолайлы орта туғызуға сеп беретіні сөзсіз.
Біздің жоспарымыз бойынша, келер жылы Қонаев қаласының Жаңа Іле алаңында ауқымды құрылыс жұмыстары басталады. Облыс орталығы мәртебесіне сай, көптеген әлеуметтік, мәдени және инфрақұрылымдық нысандар бой көтермек. Осы арқылы 2050 жылға қарай, Қонаев қаласының тұрғындар саны 200 мыңға жетеді деп күтілуде.
Бүгінде Қонаев — әлеуметтік-экономикалық жағдайы өркендеген, ауызбірлігі жарасқан, 70 мыңнан астам халқы бар 17 ұлт өкілін ұйытып отырған Алматы облысында ғана емес, республика көлемінде өзіндік орны ерекше мекенге айналды», — делінген құттықтауда.
