Ең алдымен облыс әкімі бұған дейін айтылғандай, 2 апта ішінде үйдің қалпына келетінін атап өтті.
«Бастысы — бәріңіз амансыздар. Бұл үй Қапшағай қаласының іргесі қалана бастаған сәтте салынған. Одан бері жөндеу көрді ма, белгісіз. Бірақ, электр желілері тозған. Оны ауыстырамыз», — деді әкім.
Тұрғындар болса, шатыр жанып кетсе де, оны жөндеп, жаңалаған компанияға 2027 жылға дейін несие төлеулері керек екенін айтты.
«Ары қарай компания шығынын өтеп бересіздер ме, жоқ па, ол жағын зерттеп көрейік. Мұндайда сақтандыру бойынша қандай да бір шаралар қолданылуы тиіс. Ал жөндеуді жергілікті бюджет қаржысынан бастап кетеміз», — деді Марат Сұлтанғазиев.
Сонымен қатар жұртшылық қызыл жалынды ауыздықтау үшін тез әрекет еткен жергілікті атқарушы органдарының мамандарына алғыстарын жеткізді.
Айта кетейік, кеше түнгі сағат 2.20-да 2 шағынаудандағы көпқабатты тұрғын үйдің шатыры жанып кетті. Оқиға орнына қала әкімі Нұрлан Құматаев барған болатын.
