Бұл нысан 1967 жылы салынған. Сол уақыттан бері күрделі жөндеуден өтпеген. Мектепке жеңіл — желпі жөндеу ғана жасалған. Жылу жүйесі дұрыс істемегендіктен оқу ошағындағы 3 кабинет жабық тұр. Ол кабинеттердің тоз-тозы шыққан. Сонымен қатар мектеп іргесі отырып, қабырғалары қақырай бастаған.
«Дәретхана министрліктің талабына сай салынбаған. Басында мектеп жобасында асхана қарастырылмаған. Кейіннен бірнеше кабинетті біріктіріп, асхана еттік. Биылғы оқу жылында 110 бала ыстық тамақпен қамтылған. Бірақ, тамақтанатын орын таршылық етіп отыр. Ауланы да абаттандырып, мектеп қоршауын ауыстыру керек», — деді мектеп директоры.
Қазіргі таңда мектепте 195 оқушы оқиды. Мектепалды даярлық тобында 17 бала бар.
Нысанды аралаған өңір басшысы Марат Сұлтанғазиев жобалық-сметалық құжат дайын болса, ендігі жылы күрделі жөндеу басталатынын айтты.
Бұдан кейін облыс әкімі ауданның зиялы қауым өкілдерімен кездесу өткізді.
