Аталған басқосу жайында ҚМДБ-ның muftyat.kz ресми сайтында баспасөз ақпараты тарады.
Баспасөз қызметінің мәліметінше, кездесуде өңірдегі діни ахуал талқыланды. Сонымен қатар имамдардың білімі мен біліктілігін арттыру, дін қызметкерлерін әлеуметтік тұрғыдан қолдау, аймақтағы мешіттерді кадрлармен қамтамасыз ету, халыққа дін мен дәстүр сабақтастығын дәріптеу, жастарды деструктивті діни ағымдардың идеологиясынан сақтандыру т.б. мәселелер сөз болды.
«Мемлекет басшысы Қасым-Жомарт Тоқаевтың халқымыздың біртуар тұлғасы, мемлекет және қоғам қайраткері Дінмұхамед Қонаев есімін жаңа облыс орталығындағы қалаға беру туралы бастамасы біздің діни саладағы жұмысымызға оң серпін беруде. Қонаев қаласынан Діни басқарма өкілдігін аштық», — деді Наурызбай қажы Тағанұлы.
Жиын соңында ҚМДБ төрағасы облыс басшысына игі ниетін жеткізіп, жаңа қызметіне береке тіледі. Және қос тарап ортақ жобаларды жүзеге асыруға уағдаласты.
Айта кетейік, биыл 8 шілде күні Қазақстан мұсылмандары діни басқармасының төрағасы Наурызбай қажы Тағанұлының бұйрығымен мүфтияттың Қонаев қаласында арнайы өкілдігі ашылып, жаңадан құрылған Алматы облысының бас имамы тағайындалды.
