ҰҚК баспасөз қызметінің мәлімдеуінше, операция 2022 жылғы қаңтарда Қазақстан, Өзбекстан мен Ресейдің «есірткі нарығын» психотроптық заттармен қамтамасыз етіп отырған жасырын есірткі лабораториясын жоюдан басталды.
Ведомсвто өкілдерінің ақпараты бойынша, заңсыз айналымнан есірткінің рекордтық партиясы – 188 келі «мефедрон» алынды.
Мұнан соң арнайы қызмет қылмыстық капиталды Қазақстаннан тыс шығару мен оны «тазарту» схемаларын анықтау бойынша шараларды қолға алды.
«Ақша аударымдары қаржылық айналымда қажетті деңгейде айқындалмаған криптовалютада жүргізілгені қиындық тудырғанын атап өту қажет», — деп хабарлады ҰҚК баспасөз қызметі.
ҰҚК қылмыстық тізбектің барлық қатысушыларын анықтау арқылы, «биткойндарды» қолма-қол ақшаға айналдыратын криптоақша айырбастау орнын тапты.
Ведомство өкілдерінің мәліметінше, бұл ұйым Алматыдағы әртүрлі ақша айырбастау орындарының қызметкерлері арқылы ақшаны қолма-қол беріп отырғаны белгілі болды.
Нәтижесінде қылмыстық схеманы ұйымдастырушы мен оның жақтастары ұсталды.
Мемлекет кірісіне қылмыстық топтардың іс-әрекетінен тапқан криптовалютадағы 68 млн теңге қаржысы өткізілді.
